अमेरिकन निर्बंधांना धुडकावून रशियन तेलवाहू जहाज क्युबाच्या दिशेने; ऊर्जा संकटात दिलासा

हवाना : अमेरिकेच्या तेल निर्बंधांनाही न जुमानता रशियाचे तेलवाहू जहाज क्युबाकडे रवाना झाले असून, मंगळवार (31 मार्च 2026) पर्यंत ते क्युबात पोहोचण्याची शक्यता आहे. या वर्षाच्या जानेवारीनंतर क्युबाला मिळणारी ही पहिली तेल खेप ठरणार असून, ऊर्जा संकटाचा सामना करणाऱ्या देशाला तात्पुरता दिलासा मिळण्याची अपेक्षा आहे.

‘अनातोली कोलोडकिन’ नावाचे हे रशियन जहाज सुमारे 7.3 लाख बॅरल कच्चे तेल घेऊन क्युबाच्या पूर्व किनाऱ्याजवळ रविवारी (29 मार्च) दिसून आले, अशी माहिती शिपिंग ट्रॅकर ‘मरीनट्रॅफिक’ने दिली आहे.

अमेरिकेच्या निर्बंधांमुळे क्युबावर इंधन पुरवठ्याचा तुटवडा निर्माण झाला असून देशाला तीव्र ऊर्जा आणि आर्थिक संकटाचा सामना करावा लागत आहे. अशा परिस्थितीत रशियाकडून येणारी ही तेल खेप क्युबासाठी महत्त्वाची मानली जात आहे.

सुमारे 9.6 दशलक्ष लोकसंख्या असलेल्या क्युबामध्ये ऊर्जा टंचाईमुळे वीजपुरवठा आणि औद्योगिक उत्पादनावर मोठा परिणाम झाला आहे. त्यामुळे या तेलपुरवठ्यामुळे काही प्रमाणात परिस्थिती सुधारण्याची शक्यता व्यक्त केली जात आहे.