दिवाळीच्या रात्री दोन युवतींना चिरडणारा चालक अखेर अटकेत! | राजापेठ पोलिसांची कारवाई

अमरावती - “दिवाळीच्या रात्री मंदिर दर्शन करून घरी परतणाऱ्या दोन युवतींच्या आयुष्यात अंधार आणणाऱ्या हिट अँड रन प्रकरणाचा राजापेठ पोलिसांनी अखेर उलगडा केला आहे. पोलीस पथकाच्या तत्परतेमुळे या घटनेतील फरार आरोपी चालक रोहित रमेश नंदगवली याला अटक करण्यात आली आहे.

मिळालेल्या माहितीनुसार, पायल राजेंद्र बुंदेले (22) आणि वैष्णवी विष्णु थोरात (21) या दोन युवती कन्वरनगर परिसरातून दुचाकीवर जात असताना, मागून आलेल्या एमएच 49 बीडब्ल्यू 5985 क्रमांकाच्या पांढऱ्या कारने त्यांना जोरदार धडक दिली. धडक इतकी भीषण होती की, दोघी गंभीर जखमी झाल्या. त्यापैकी वैष्णवीची प्रकृती अजूनही चिंताजनक असून तिच्यावर खासगी रुग्णालयात उपचार सुरू आहेत.

धडक दिल्यानंतर आरोपी रोहित नंदगवली कारसह घटनास्थळावरून पळून गेला. मात्र, राजापेठ पोलिसांनी या घटनेची गंभीर दखल घेत तात्काळ तपासाला सुरुवात केली. ठाणेदार प्युनिट कुलट यांच्या नेतृत्वाखाली, पीएसआय हिवारे, हेडकॉन्स्टेबल मनीष कर्पे आणि त्यांच्या पथकाने सीसीटीव्ही फुटेज आणि साक्षीदारांच्या माहितीच्या आधारे अवघ्या काही तासांत आरोपीचा शोध घेतला.

पोलिसांनी लुंबिनी नगर येथील रहिवासी असलेल्या रोहित नंदगवलीला ताब्यात घेतले. प्राथमिक माहितीनुसार, आरोपी मद्यधुंद अवस्थेत आणि अत्यंत वेगात कार चालवत होता. या कारवाईत पोलिसांनी केवळ आरोपीलाच नाही, तर अपघातासाठी वापरलेली कारही जप्त केली आहे.

राजापेठ पोलिसांच्या या जलद आणि चातुर्यपूर्ण कारवाईमुळे नागरिकांमध्ये समाधानाचे वातावरण आहे. शहरात बेफिकीरपणे वाहन चालवणाऱ्यांवर कठोर कारवाई करण्याची मागणी जोर धरू लागली आहे.”