कामरगावमध्ये ठाकरे ज्वेलर्सवर मध्यरात्री दरोडा; सुमारे ५ लाखांचा ऐवज लंपास
कामरगाव (जि. वाशिम) : कामरगावमध्ये पुन्हा एकदा चोरट्यांनी धुमाकूळ घालत व्यापाऱ्यांची झोप उडवली आहे. बसस्थानकापासून हाकेच्या अंतरावर असलेल्या बानवले कॉम्प्लेक्समधील ठाकरे ज्वेलर्स या दुकानावर मध्यरात्री डल्ला टाकत सुमारे ४ लाख ९० हजार रुपयांचा ऐवज लंपास करण्यात आला. या घटनेमुळे व्यापारी वर्गात भीतीचे वातावरण निर्माण झाले असून पोलिसांच्या सुरक्षाव्यवस्थेवर गंभीर प्रश्नचिन्ह उपस्थित झाले आहे.
कामरगाव हे Washim district मधील महत्त्वाचे व्यापारी केंद्र मानले जाते. मात्र, येथे सुरक्षेचा बोजवारा उडाल्याचे चित्र या घटनेतून समोर आले आहे.
२८ फेब्रुवारीच्या रात्री अमरावती येथील रहिवासी योगेश दिलीपराव ठाकरे यांनी नेहमीप्रमाणे आपले सोन्या-चांदीचे दुकान बंद केले. मात्र १ मार्च रोजी पहाटे साडेपाचच्या सुमारास दुकान फोडल्याची माहिती मिळताच एकच खळबळ उडाली. अज्ञात चोरट्यांनी दुकानाचे चॅनल गेट आणि शटरचे कुलूप तोडून आत प्रवेश केला.
चोरट्यांनी दुकानातील तब्बल २ किलो ७० ग्रॅम चांदीचे दागिने, देवघरातील वस्तू तसेच जुनी मोड असा एकूण सुमारे ४ लाख ९० हजार रुपयांचा ऐवज लंपास केला. विशेष म्हणजे, या दुकानात यापूर्वीही दोन ते तीन वेळा चोरीच्या घटना घडल्या होत्या; मात्र अद्याप कोणत्याही प्रकरणाचा छडा लागलेला नाही.
घटनेनंतर स्थानिक व्यापाऱ्यांनी पोलिस प्रशासनाविरोधात तीव्र संताप व्यक्त केला आहे. गावात रात्रीची गस्त नियमित होत नसल्याचा आरोप करण्यात येत आहे. पूर्वी पोलीस चौकीत दिवसा तीन आणि रात्री दोन कर्मचारी तैनात असायचे; मात्र आता एवढ्या मोठ्या गावाची सुरक्षा केवळ एका कर्मचाऱ्यावर सोपवण्यात आल्याची बाब समोर आली आहे.
“आम्ही रात्रंदिवस मेहनत करून व्यवसाय करतो, पण आमचा माल सुरक्षित नाही,” असा संतप्त सवाल व्यापाऱ्यांनी उपस्थित केला आहे. पोलीस गस्त वाढवून पूर्ण क्षमतेने कर्मचारी तैनात करण्यात यावेत, अन्यथा आंदोलन छेडण्याचा इशारा ग्रामस्थांनी दिला आहे. सध्या या प्रकरणाचा पुढील तपास पोलीस करत आहेत.
कामरगावमध्ये वाढत्या चोरीच्या घटनांमुळे व्यापाऱ्यांसह नागरिकांमध्ये भीतीचे वातावरण आहे. आरोपींना किती लवकर अटक होते आणि सुरक्षाव्यवस्था कधी मजबूत होते, याकडे सर्वांचे लक्ष लागले आहे.
