citynewslatestnewss breakingnewsMaharashtraNagpurNagpurCrimeNagpurPolice

आठ महिन्यांपासून पोलिसांना गुंगारा देणारा आरोपी अखेर जेरबंद; तहसील पोलिसांची कारवाई!

मारहाण आणि शिवीगाळीच्या गुन्ह्यातील नौशाद खानला राहत्या घरातून अटक; गुप्त माहितीच्या आधारे तपास पथकाची धडक कारवाई, अन्य आरोपींचाही गुन्हेगारी इतिहास उघड

नागपूर : नागपुरात मारहाण आणि शिवीगाळीच्या गुन्ह्यात गेल्या आठ महिन्यांपासून फरार असलेल्या आरोपीला अखेर अटक करण्यात तहसील पोलिसांना यश आले आहे. नौशाद खान असे अटक करण्यात आलेल्या आरोपीचे नाव आहे. गुन्हा दाखल झाल्यापासून पोलीस त्याचा शोध घेत होते. मात्र, वारंवार शोध घेऊनही तो पोलिसांच्या हाती लागत नव्हता. अखेर गुप्त बातमीदाराकडून मिळालेल्या माहितीच्या आधारे तहसील पोलिसांच्या तपास पथकाने त्याच्या राहत्या घरी धाड टाकून त्याला ताब्यात घेतले. या कारवाईमुळे गेल्या अनेक महिन्यांपासून फरार असलेल्या आरोपीला पकडण्यात पोलिसांना यश आले आहे.

पोलिसांनी दिलेल्या माहितीनुसार, १० डिसेंबर २०२५ रोजी मिळालेल्या तक्रारीवरून तहसील पोलीस ठाण्यात अपराध क्रमांक ८४६/२५ अन्वये भारतीय न्याय संहितेच्या कलम २९६, ११५(२), ३५१(३) आणि ३(५) अंतर्गत गुन्हा दाखल करण्यात आला होता. फिर्यादी घरी जेवण करत असताना चार आरोपी त्यांच्या घरी आले. यावेळी आरोपींनी फिर्यादीला शिवीगाळ करून हाताबुक्क्यांनी मारहाण केल्याचा आरोप तक्रारीत करण्यात आला होता.

या प्रकरणाचा तपास सुरू झाल्यानंतर पोलिसांनी काही आरोपींना सूचनापत्र देऊन न्यायालयात हजर राहण्यास सांगितले होते. मात्र, नौशाद खानसह काही आरोपी फरार झाले होते. पोलिसांनी आरोपींच्या घरांसह त्यांच्या संभाव्य ठिकाणी शोधमोहीम राबवली, तरीही ते मिळून येत नव्हते. त्यामुळे पोलिसांकडून त्यांचा शोध सुरूच होता.

गुप्त माहिती मिळताच राहत्या घरावर धाड

दरम्यान, तहसील पोलीस ठाण्याच्या तपास पथकाला गुप्त बातमीदाराकडून नौशाद खान हा आपल्या राहत्या घरी लपून बसल्याची माहिती मिळाली. या माहितीची दखल घेत पोलीस उपनिरीक्षक पवार आणि त्यांच्या तपास पथकाने तातडीने हालचाली करत त्याच्या घरावर कारवाई केली. यावेळी नौशाद खानला ताब्यात घेऊन अटक करण्यात आली.

अन्य आरोपींवरही विविध गुन्हे दाखल

या प्रकरणातील अन्य आरोपींची गुन्हेगारी पार्श्वभूमीही समोर आली आहे. पोलिसांच्या माहितीनुसार, संबंधित आरोपींवर यापूर्वीही विविध गुन्हे दाखल आहेत. त्यापैकी एका आरोपीविरुद्ध महाराष्ट्र संघटित गुन्हेगारी नियंत्रण कायद्यानुसार (मोक्का) प्रस्तावाची कारवाई करण्यात आल्याची माहिती आहे.

आठ महिन्यांपासून फरार असलेल्या नौशाद खानला अटक केल्यानंतर त्याला पुढील कायदेशीर कारवाईसाठी न्यायालयात हजर करण्यात येत आहे. या प्रकरणातील अन्य फरार आरोपींचा शोध आणि गुन्ह्याच्या पुढील तपासाची प्रक्रिया तहसील पोलिसांकडून सुरू आहे.

Show More

Related Articles

Leave a Reply

Your email address will not be published. Required fields are marked *

Back to top button