अमरावती-नागपूर महामार्गावर ट्रक जळून खाक; रॉंग साईडने वाहन चालवल्याने अपघात
पहाटे सहाच्या सुमारास ट्रकला भीषण आग; ट्रक आणि कारची धडक, अपघातात शिक्षिका जखमी, जीवितहानी टळली
अमरावती-नागपूर राष्ट्रीय महामार्गावर ट्रकला लागलेल्या आगीमुळे वाहतुकीचा खोळंबा झाल्याची घटना समोर आली आहे. पुण्याहून नागपूरकडे वेस्ट इलेक्ट्रिकल साहित्य घेऊन जाणाऱ्या ट्रकला अचानक आग लागली. आगीने रौद्ररूप धारण केल्याने संपूर्ण ट्रक जळून खाक झाला. दरम्यान, वाहतूक विस्कळीत झाल्याने काही वाहनचालकांनी रॉंग साईडने वाहने नेण्याचा प्रयत्न केला. याचदरम्यान ट्रक आणि कारचा अपघात झाला असून, या घटनेत एक शिक्षिका जखमी झाली आहे.
अमरावती : अमरावती-नागपूर राष्ट्रीय महामार्गावर सकाळी सहाच्या सुमारास ही घटना घडली. पुण्याहून नागपूरच्या दिशेने वेस्ट इलेक्ट्रिकल साहित्य घेऊन जाणाऱ्या एमएच ४८ बीएम १७८७ क्रमांकाच्या ट्रकला अचानक आग लागली. आगीवर वेळीच नियंत्रण मिळवता न आल्याने आगीने संपूर्ण ट्रकला आपल्या कवेत घेतले. त्यामुळे ट्रक जळून खाक झाला.
या घटनेमुळे महामार्गावरील वाहतुकीवर परिणाम झाला आणि काही काळ वाहतुकीचा खोळंबा निर्माण झाला. दरम्यान, काही वाहनचालकांनी वाहतूक कोंडीतून मार्ग काढण्यासाठी विरुद्ध दिशेने म्हणजेच रॉंग साईडने वाहने नेण्याचा प्रयत्न केला. याचदरम्यान विरुद्ध दिशेने येणाऱ्या एमएच ४० बीएल ९१९९ क्रमांकाच्या ट्रकची आणि एमएच २७ डीयू ५९८९ क्रमांकाच्या कारची धडक झाली.
या अपघातात कारमधील एक शिक्षिका जखमी झाल्याची माहिती आहे. घटनास्थळी उपस्थित नागरिकांनी तत्काळ मदत करत जखमी शिक्षिकेला उपचारासाठी रुग्णालयात दाखल केले. सुदैवाने, या दोन्ही घटनांमध्ये कोणतीही जीवितहानी झाली नाही.
दरम्यान, महामार्गावर ट्रकला आग लागल्याने आणि त्यानंतर झालेल्या अपघातामुळे काही काळ वाहतुकीत अडथळा निर्माण झाला. ट्रकला आग नेमकी कशामुळे लागली, हे अद्याप स्पष्ट झालेले नाही. या घटनेमुळे महामार्गावर वाहतूक नियमांचे पालन करण्याचे आणि वाहतूक कोंडीच्या वेळी विरुद्ध दिशेने वाहन न चालवण्याचे महत्त्व पुन्हा अधोरेखित झाले आहे.
