नागपूरची अग्निसुरक्षा धोक्यात? रुग्णालये, कोचिंग, हॉस्टेल सुरक्षित आहेत का?
अमरावती दुर्घटनेनंतर फायर ऑडिटचा मुद्दा ऐरणीवर; नागपूरच्या अग्निसुरक्षा व्यवस्थेबाबत प्रशासनाकडून स्पष्ट माहिती नाही
नागपूर : अमरावतीच्या जिल्हा स्त्री रुग्णालयातील भीषण आगीत तीन नवजात बालकांचा मृत्यू झाल्यानंतर अग्निसुरक्षेचा मुद्दा पुन्हा एकदा ऐरणीवर आला आहे. त्यातच लखनऊमधील कोचिंग क्लासेसच्या दुर्घटनेनंतर रुग्णालये, कोचिंग क्लासेस आणि हॉस्टेल्समधील फायर सेफ्टी व्यवस्थेचा प्रश्न अधिक गंभीर झाला आहे.
या पार्श्वभूमीवर राज्याचे आरोग्यमंत्री प्रकाश आबिटकर यांनी शासकीय रुग्णालयांचे फायर ऑडिट करण्याचे आदेश दिले आहेत. त्यामुळे आता नागपूर शहरातील रुग्णालये आणि इतर संवेदनशील ठिकाणांवरील अग्निसुरक्षा व्यवस्था कितपत सक्षम आहे, याकडे नागरिकांचे लक्ष लागले आहे.
नागपूरच्या रुग्णालयांचे फायर ऑडिट झाले का?
नागपूर महानगरपालिकेच्या अग्निशमन विभागाकडून शहरातील रुग्णालये, कोचिंग क्लासेस आणि हॉस्टेल्समधील अग्निसुरक्षा व्यवस्थेबाबत माहिती जाणून घेण्याचा प्रयत्न करण्यात आला.
या ठिकाणी अग्निशमन यंत्रणा उपलब्ध आहे का, फायर सेफ्टीची तपासणी आणि ऑडिट नियमितपणे केले जाते का, आपत्कालीन परिस्थितीत बाहेर पडण्यासाठी योग्य मार्ग आहेत का, अशा अनेक प्रश्नांवर माहिती घेण्याचा प्रयत्न करण्यात आला.
प्रशासनाकडून स्पष्ट माहिती मिळाली नाही?
मात्र, या विषयावर प्रशासनाकडून सविस्तर माहिती कॅमेऱ्यासमोर उपलब्ध होऊ शकली नाही. त्यामुळे नागपूर शहरातील रुग्णालये, कोचिंग क्लासेस आणि हॉस्टेल्सची अग्निसुरक्षा व्यवस्था नेमकी किती सक्षम आहे, याबाबत प्रश्नचिन्ह कायम आहे.
अमरावतीसारखी दुर्घटना घडल्यानंतरच फायर ऑडिटकडे लक्ष दिले जाणार का, असा सवालही आता उपस्थित होत आहे.
फायर ऑडिटच्या अहवालांची माहिती सार्वजनिक होणार का?
शहरातील संवेदनशील ठिकाणांची नियमित अग्निसुरक्षा तपासणी होते का? त्रुटी आढळल्यास संबंधित संस्थांवर काय कारवाई केली जाते? किती रुग्णालये, कोचिंग क्लासेस आणि हॉस्टेल्सचे फायर ऑडिट झाले आहे? तसेच नियमांचे उल्लंघन करणाऱ्या संस्थांवर कारवाई झाली आहे का? या प्रश्नांची स्पष्ट माहिती प्रशासनाकडून समोर येणे गरजेचे आहे.
अमरावतीतील दुर्घटनेत तीन निष्पाप नवजात बालकांचा जीव गेल्यानंतर आता नागपूर प्रशासनानेही अग्निसुरक्षेबाबत अधिक पारदर्शकता दाखवण्याची गरज आहे. शहरातील रुग्णालये, कोचिंग क्लासेस आणि हॉस्टेल्स खरोखर सुरक्षित आहेत का, याचे उत्तर आता फायर ऑडिटच्या अहवालातूनच स्पष्ट होणार आहे.
