भांडेवाडीत अवैध देशी दारूविक्रीवर गुन्हेशाखेची कारवाई

युनिट ०५ची धडक कारवाई; २५१ बाटल्या जप्त, १२ हजार ५५० रुपयांचा मुद्देमाल ताब्यात

नागपूर | प्रतिनिधी

नागपूर शहरात अवैध देशी दारूविक्रीविरोधात गुन्हेशाखेच्या युनिट ०५ने मोठी कारवाई केली आहे. भांडेवाडी पोलीस ठाण्याच्या हद्दीतील अबुमिया नगर परिसरात एका महिलेच्या घरासमोर अवैधरित्या देशी दारूचा साठा करून विक्री केली जात असल्याची माहिती पोलिसांना मिळाली. त्यानंतर पोलिसांनी कारवाई करत देशी दारूच्या तब्बल २५१ बाटल्या जप्त केल्या. जप्त मुद्देमालाची एकूण किंमत १२ हजार ५५० रुपये आहे.

अबुमिया नगर परिसरात कारवाई

पोलिसांनी दिलेल्या माहितीनुसार, १५ ऑगस्ट रोजी दुपारी साडेतीनच्या सुमारास अबुमिया नगर परिसरात ही कारवाई करण्यात आली. मंगला महाले ही महिला अवैधरित्या देशी दारूचा साठा करून त्याची विक्री करत असल्याची माहिती पोलिसांना मिळाली होती.

त्यानुसार पंचांसमक्ष पाहणी केली असता पिवळ्या रंगाच्या प्लास्टिक बोरीमध्ये ९० एमएलच्या देशी दारूच्या १२२ बाटल्या आढळून आल्या. या बाटल्यांची किंमत ६ हजार १०० रुपये असल्याचे पोलिसांनी सांगितले.

२५१ बाटल्या जप्त

यानंतर काळपट आणि गुलाबी रंगाच्या प्लास्टिक बोऱ्यांची पाहणी केली असता त्यामध्ये ९० एमएलच्या आणखी १२९ बाटल्या आढळून आल्या. या दारूची किंमत ६ हजार ४५० रुपये आहे.

अशाप्रकारे पोलिसांनी एकूण २५१ प्लास्टिक बाटल्या आणि १२ हजार ५५० रुपयांचा मुद्देमाल जप्त केला.

दारूबंदी कायद्यानुसार गुन्हा दाखल

या प्रकरणी भांडेवाडी पोलीस ठाण्यात महाराष्ट्र दारूबंदी कायद्याच्या कलम ६५ (ई) अंतर्गत गुन्हा दाखल करण्यात आला आहे.

पुढील कारवाईसाठी संबंधित कागदपत्रे भांडेवाडी पोलिसांच्या ताब्यात देण्यात आली आहेत. तसेच आरोपी महिलेला १६ ऑगस्ट रोजी पोलीस ठाण्यात हजर राहण्याबाबत सूचना पत्र देण्यात आले आहे.

भांडेवाडी परिसरातील या कारवाईमुळे अवैध देशी दारूविक्री करणाऱ्यांवर पोलिसांची करडी नजर असल्याचे स्पष्ट झाले आहे. या प्रकरणाचा पुढील तपास भांडेवाडी पोलीस करीत आहेत.