घरफोडी व वाहनचोरी करणाऱ्या पाच जणांच्या टोळीला अटक

वालीव गुन्हे प्रकटीकरण शाखेची कारवाई; आठ गुन्ह्यांची उकल, तीन लाखांचा मुद्देमाल जप्त

वसई | प्रतिनिधी

घरफोडी, चोरी आणि वाहनचोरीच्या गुन्ह्यांमध्ये सक्रिय असलेल्या पाच आरोपींच्या टोळीला अटक करण्यात वालीव गुन्हे प्रकटीकरण शाखेच्या पोलिसांना मोठे यश आले आहे. या कारवाईत पोलिसांनी आरोपींकडून आठ गुन्ह्यांची उकल करत सुमारे तीन लाख रुपयांचा मुद्देमाल हस्तगत केला आहे.

पोलिसांनी दिलेल्या माहितीनुसार, ४ जून रोजी पहाटे सुमारे ३ वाजण्याच्या सुमारास आरोपींनी वसईतील चिंचपाडा परिसरातील एका कंपनीला लक्ष्य केले. कंपनीच्या मुख्य शटरवरील लोखंडी जाळी उचकटून त्यांनी आत प्रवेश केला. त्यानंतर कंपनीत ठेवलेल्या सुमारे ५६ हजार रुपये किमतीच्या अॅल्युमिनियमच्या ४०० प्लेट्स चोरून नेल्या.

या घरफोडीची तक्रार दाखल झाल्यानंतर वालीव गुन्हे प्रकटीकरण शाखेने घटनास्थळावरील तांत्रिक पुरावे, सीसीटीव्ही फुटेज आणि गोपनीय माहितीच्या आधारे तपास सुरू केला. तपासादरम्यान संशयितांची ओळख पटवून पोलिसांनी सापळा रचत पाच आरोपींना अटक केली.

चौकशीत आरोपींकडून घरफोडी, चोरी आणि वाहनचोरीसह एकूण आठ गुन्ह्यांची कबुली मिळाली. पोलिसांनी त्यांच्याकडून चोरीस गेलेला माल आणि इतर मुद्देमाल असा मिळून सुमारे तीन लाख रुपयांचा ऐवज जप्त केला आहे.

या टोळीमुळे परिसरात घडलेल्या अनेक चोरीच्या घटनांचा उलगडा झाला असून, आरोपींकडून आणखी काही गुन्ह्यांची माहिती समोर येण्याची शक्यता असल्याने पोलिसांकडून सखोल चौकशी सुरू आहे. या यशस्वी कारवाईमुळे परिसरातील घरफोडी आणि चोरीच्या गुन्ह्यांवर आळा बसण्यास मदत होईल, असा विश्वास पोलिसांनी व्यक्त केला आहे.