आठवड्याची सुरुवातच सर्वसामान्यांसाठी दिलासादायक ठरली आहे. सराफा बाजारात सोने आणि चांदीच्या दरात लक्षणीय घसरण नोंदवली गेली असून खरेदीदारांना मोठा फायदा होत आहे. विशेषतः Multi Commodity Exchange of India (MCX) वर सोमवारी चांदीच्या दरात मोठी पडझड दिसून आली.
चांदी ८ हजारांनी स्वस्त
गेल्या चार दिवसांत चांदीच्या दरात तब्बल ८,००० रुपयांची घसरण झाली आहे. मागील आठवड्यात १ किलो चांदीचा दर २,४४,३६० रुपये होता. तो सोमवारी २,३५,५०३ रुपयांवर आला. फक्त आज सकाळीच चांदी ८,८५७ रुपयांनी स्वस्त झाली. त्यामुळे गुंतवणूकदारांसह दागिने खरेदी करणाऱ्यांमध्ये उत्साहाचे वातावरण आहे.
विशेष म्हणजे, २९ जानेवारी रोजी चांदीने ४,२०,०४८ रुपयांचा उच्चांक गाठला होता. मात्र त्यानंतर अवघ्या पंधरा दिवसांत दरात जवळपास दीड लाख रुपयांची घसरण झाली आहे. या घसरणीमुळे बाजारात पुन्हा खरेदीची हालचाल वाढताना दिसत आहे.
सोन्यालाही उतरती कळा
चांदीप्रमाणे सोन्याच्या दरातही घट झाली आहे. प्रति तोळा सोन्याचा दर सुमारे १,७०० रुपयांनी घसरला आहे. काही दिवसांपूर्वी १.८० लाखांच्या आसपास असलेला दर सध्या १,५४,१९१ रुपयांवर आला आहे. मागील काही दिवसांत सोन्याच्या दरात सुमारे २४ हजार रुपयांची घट झाली आहे.
पुढे काय?
आंतरराष्ट्रीय बाजारातील चढ-उतार, डॉलरचा दर आणि औद्योगिक मागणी या घटकांमुळे दरात बदल होत असल्याचे तज्ज्ञांचे मत आहे. दरात आणखी घसरण होण्याची शक्यता व्यक्त केली जात असली तरी गुंतवणूक करताना सावधगिरी बाळगण्याचा सल्ला दिला जात आहे.
एकूणच, सध्या सोने-चांदी स्वस्त झाल्याने सर्वसामान्य ग्राहकांसाठी खरेदीची ही योग्य संधी मानली जात आहे.
