अमरावती सुपर स्पेशालिटी हॉस्पिटलचा भीमपराक्रम: ४ वर्षांच्या चिमुरडीवर यशस्वी ‘कॉक्लियर इम्प्लांट’ शस्त्रक्रिया

अमरावती: विभागीय संदर्भ सेवा (सुपर स्पेशालिटी) रुग्णालयाने वैद्यकीय क्षेत्रात पुन्हा एकदा आपली मोहर उमटवली आहे. आष्टी (जि. वर्धा) येथील एका ४ वर्षांच्या बालिकेवर अत्यंत गुंतागुंतीची आणि आव्हानात्मक ‘कॉक्लियर इम्प्लांट’ शस्त्रक्रिया यशस्वीरित्या पार पडली. सार्वजनिक आरोग्य विभागांतर्गत झालेली ही तिसरी यशस्वी शस्त्रक्रिया असून, यामुळे या चिमुरडीला आता ऐकू येणाऱ्या जगाचे दरवाजे खुले झाले आहेत.

आर्थिक अडचणींवर मात; जिल्हा नियोजन समितीचे पाठबळ

सदर रुग्ण मुलगी ४ वर्षांची असल्याने तांत्रिक कारणांमुळे ‘महात्मा जोतिबा फुले जन आरोग्य योजने’अंतर्गत तिच्यावर उपचार करणे शक्य नव्हते. मात्र, तिची परिस्थिती आणि भविष्याचा विचार करून अमरावती जिल्हा नियोजन समितीने (DPC) या शस्त्रक्रियेसाठी संपूर्ण निधी उपलब्ध करून दिला. यामुळे एका गरीब कुटुंबातील मुलीला लाखो रुपयांची शस्त्रक्रिया मोफत मिळणे शक्य झाले.

आशेचा किरण: खासगी रुग्णालयांचा खर्च परवडणारा नव्हता

रुग्ण मुलगी जन्मजात मूकबधिर होती. नऊ महिन्यांची असताना पालकांना ही बाब लक्षात आली. त्यांनी नागपूरसह विविध ठिकाणच्या खासगी रुग्णालयांत धाव घेतली, परंतु तिथला प्रचंड खर्च या आर्थिकदृष्ट्या कमकुवत कुटुंबाला परवडणारा नव्हता. अखेर प्रसारमाध्यमांतून सुपर स्पेशालिटी रुग्णालयातील यशस्वी शस्त्रक्रियांची माहिती मिळाल्यावर त्यांनी अमरावती गाठले. ५ फेब्रुवारी २०२६ रोजी ही शस्त्रक्रिया पार पडली.

अत्याधुनिक तंत्रज्ञानाचा वापर

या शस्त्रक्रियेमध्ये ‘स्मार्ट नेव’ (Smart Nav) आणि ‘कन्व्हेंशनल’ यांसारख्या अत्याधुनिक तंत्रज्ञानाचा वापर करण्यात आला. शस्त्रक्रियेनंतर काही आठवड्यांतच बालिकेची श्रवणशक्ती कार्यान्वित होईल, ज्यामुळे तिचा सर्वांगीण विकास होण्यास मदत होईल.

ही तज्ज्ञांची टीम होती कार्यरत

वैद्यकीय अधीक्षक डॉ. अमोल नरोटे यांच्या मार्गदर्शनाखाली तज्ज्ञ डॉक्टरांच्या फौजेने हे शिवधनुष्य पेलले:

• ई.एन.टी. विभाग: डॉ. जीवन वेदी (विभागप्रमुख, इंदिरा गांधी वैद्यकीय महाविद्यालय), डॉ. रितेश शेलकर, डॉ. मंगेश मेंढे (विशेष कार्य अधिकारी व ई.एन.टी. सर्जन).
• इतर तज्ज्ञ: डॉ. अनिता पटवरकर, डॉ. अनिता अंभोरे (न्यूरो फिजिशियन), डॉ. ऋषिकेश नागलकर (पीडियाट्रिशियन).
• ऑडिओलॉजी व भूलतज्ज्ञ: लक्ष्मण मोरे (ऑडिओलॉजिस्ट), डॉ. बाळकृष्ण बागवाले, डॉ. दिपाली देशमुख, डॉ. शीतल सोळंके, डॉ. अश्विनी मढावी, डॉ. रमणिका ढोमणे.
• सहकार्य: डॉ. उज्वला मोहोड, शीतल बोंडे, ऋषिकेश धस आणि चंदा खोडके यांच्यासह न्यूरो व ओटी विभागातील परिचारिका आणि तांत्रिक कर्मचाऱ्यांचे विशेष सहकार्य लाभले.

“सार्वजनिक आरोग्य विभागात अशा प्रकारच्या गुंतागुंतीच्या शस्त्रक्रिया यशस्वी होणे, हे सामान्य रुग्णांसाठी वरदान ठरत आहे. जिल्हा नियोजन समितीच्या निधीमुळे एका गरजू बालकाला नवे जीवन मिळाले आहे.” > — रुग्णालय प्रशासन, सुपर स्पेशालिटी हॉस्पिटल, अमरावती.