स्पाच्या नावाखाली सुरू असलेल्या सेक्स रॅकेटचा पर्दाफाश, पाच महिलांची सुटका, आरोपी अटक
पुणे शहर पोलिसांनी स्पाच्या नावाखाली सुरू असलेल्या सेक्स रॅकेटचा पर्दाफाश केला आहे. शनिवारी दुपारी विमान नगर परिसरातील सिग्नेचर थाई स्पा’वर छापा टाकून पोलिसांनी मोठी कारवाई केली. या कारवाईत पाच महिलांची सुटका करण्यात आली असून स्पा चालकाला अटक करण्यात आली आहे.
मिळालेल्या गुप्त माहितीनुसार, विमानतळ पोलीस ठाण्याचे उपनिरीक्षक नितीन राठोड यांच्या नेतृत्वाखालील पथकाने दत्ता मंदिर चौकाजवळील एका रो-हाऊसमध्ये छापा टाकला. तपासात या स्पामध्ये मसाजच्या नावाखाली देहव्यापार सुरू असल्याचं उघड झालं.
सुटका करण्यात आलेल्या महिला उत्तर प्रदेश, मुंबई आणि दिल्ली येथील रहिवासी असून, त्यांना जबरदस्तीने देहव्यापारात ढकलण्यात आल्याची माहिती पोलिसांनी दिली आहे. या महिला गेल्या काही महिन्यांपासून संबंधित स्पामध्ये काम करत होत्या.
या प्रकरणी आसामचा रहिवासी असलेला 28 वर्षीय स्पा चालक मेहबूब खान लष्कर याच्यावर भारतीय न्याय संहिता कलम 143(3) (मानव तस्करी) तसेच अनैतिक मानवी वाहतूक प्रतिबंधक कायदा कलम 3, 4, 5 आणि 7 अंतर्गत गुन्हा दाखल करण्यात आला आहे.
छाप्यात पोलिसांनी रोख रक्कम, दोन पॉइंट-ऑफ-सेल मशीन, बिल बुक आणि इतर साहित्य असा एकूण 38 हजार 475 रुपयांचा मुद्देमाल जप्त केला आहे.
वरिष्ठ पोलीस निरीक्षक गोविंद जाधव यांनी सांगितलं की, आरोपी ग्राहकांशी संपर्क साधण्यासाठी ऑनलाइन व सोशल मीडिया प्लॅटफॉर्मचा वापर करत होता. या प्रकरणाचा पुढील तपास सुरू असून आणखी आरोपींचा सहभाग असण्याची शक्यता पोलिसांनी व्यक्त केली आहे.
