शिंदे गटातील माजी खासदाराच्या पत्नीचं नाव वादाच्या भोवऱ्यात**
मुंबई महापालिकेसह राज्यातील इतर महापालिकांच्या निवडणुकांची घोषणा होताच राजकीय हालचालींना वेग आला आहे. मोर्चेबांधणी, उमेदवारांची चाचपणी आणि समीकरणांची जुळवाजुळव सुरू असतानाच मुंबईतील एका प्रभागात आदर्श आचारसंहितेच्या उल्लंघनाचा गंभीर प्रकार उघडकीस आला आहे. या प्रकरणामुळे चेंबूर परिसरात मोठा गोंधळ निर्माण झाला असून, शिंदे गटातील माजी खासदाराच्या पत्नीचं नाव थेट वादाच्या केंद्रस्थानी आलं आहे.
मुंबई महापालिकेवर कुणाची सत्ता? उत्सुकता टोकाला
आशिया खंडातील सर्वात मोठ्या महापालिकेवर कोणाची सत्ता येणार, याकडे संपूर्ण राज्याचं लक्ष लागलं आहे. महायुतीसह सर्वच पक्षांकडून उमेदवारांची चाचपणी सुरू असताना, स्थानिक पातळीवर मतदारांवर प्रभाव टाकण्यासाठी काही इच्छुकांकडून नियमबाह्य प्रयत्न सुरू असल्याचं चित्र दिसत आहे. मात्र, मुंबईतील एका मतदारसंघात नागरिकांनीच अशा प्रयत्नांना जोरदार विरोध करत थेट रस्त्यावर उतरल्याचं पाहायला मिळालं.
माजी खासदाराच्या पत्नींकडून साड्यांचं वाटप, प्रकरण पेटलं
मुंबईतील प्रभाग क्रमांक १४२ मध्ये शिवसेना (शिंदे गट) कडून इच्छुक उमेदवार असलेल्या कामिनी राहुल शेवाळे यांच्यावर गंभीर आरोप करण्यात आले आहेत. लल्लुभाई अमीनचंद वसाहत, इमारत क्रमांक ५, कोयना को-ऑपरेटिव्ह हाऊसिंग सोसायटी तसेच परिसरात महिलांना साड्यांचे वाटप सुरू असल्याची माहिती शिवसैनिकांनी विठ्ठल गोविंद लोकरे यांना दिली.
माहिती मिळताच लोकरे तात्काळ घटनास्थळी पोहोचले. तेथे त्यांनी संपूर्ण प्रकाराचे व्हिडिओ शूटिंग केले. यावेळी स्थानिक महिलांनी,
“या साड्या आम्हाला कामिनी राहुल शेवाळे यांच्याकडून देण्यात आल्या आहेत,”
अशा प्रतिक्रिया कॅमेऱ्यासमोर दिल्या.
साड्यांची होळी; परिसरात एकच खळबळ
या प्रकारानंतर संतप्त महिलांनी त्या साड्यांची उत्स्फूर्तपणे होळी केली, ज्यामुळे परिसरात मोठा राडा झाला. एवढंच नव्हे, तर कामिनी शेवाळे यांच्या कार्यालयातून साड्या आणि पैशांचे वाटप सुरू असल्याची माहितीही शिवसैनिकांनी दिली.
यानंतर शिवसेना (उबाठा) पक्षाच्या इच्छुक उमेदवार सुनंदा विठ्ठल लोकरे यांच्यासह कार्यकर्ते कार्यालयात दाखल झाले. तपासणीदरम्यान त्या ठिकाणी दोन गोणी साड्या आणि रोख रक्कम आढळून आल्याने खळबळ उडाली.
निवडणूक आयोगाकडे तक्रार; आरोपांचा पाऊस
या संपूर्ण प्रकरणाची तक्रार ठाकरे गटाच्या शिवसेनेकडून थेट निवडणूक आयोगाकडे दाखल करण्यात आली आहे.
माजी खासदार राहुल शेवाळे यांच्या पत्नी कामिनी शेवाळे या निवडणुकीत बहुमत मिळवण्यासाठी आचारसंहितेचा भंग करत असल्याचा आरोप तक्रारीत करण्यात आला आहे.
‘चेंबूरमध्ये मशालच पेटणार’ – ठाकरे गटाचा इशारा
हा प्रकार उघडकीस आणत शिवसेना (उबाठा) पक्षाने आक्रमक भूमिका घेतली आहे.
“अशा प्रकारे पैसे आणि वस्तू वाटून निवडणूक जिंकू देणार नाही. चेंबूरमध्ये ‘मशाल’च पेटणार,”
असा ठाम निर्धार पक्षाकडून व्यक्त करण्यात आला आहे.
राजकीय वातावरण तापलं
मुंबई महापालिका निवडणुकीच्या पार्श्वभूमीवर हा प्रकार अत्यंत संवेदनशील मानला जात असून, निवडणूक आयोग यावर काय कारवाई करतो, याकडे सर्वांचं लक्ष लागलं आहे. दरम्यान, या घटनेमुळे चेंबूरमधील राजकीय वातावरण चांगलंच तापलं आहे.
