आरोग्य सेवांचा वेग वाढवण्यासाठी डिसेंबरमध्ये ‘गोल्डन कार्ड’वर फोकस
पात्र नागरिकांना मोफत व दर्जेदार आरोग्य सुविधा मिळाव्यात, यासाठी गोल्डन कार्ड नोंदणीला डिसेंबर महिन्यात विशेष गती देण्यात येणार आहे. या विशेष मोहिमेची घोषणा जिल्हाधिकारी आशिष येरेकर यांनी केली.
गोल्डन कार्डमुळे नागरिकांना आयुष्मान भारत आरोग्य योजना अंतर्गत जिल्ह्यातील 51 अंगीकृत रुग्णालयांमध्ये मोफत उपचार मिळणार आहेत. त्यामुळे एकही पात्र लाभार्थी योजनेपासून वंचित राहू नये, यासाठी प्रशासनाकडून विशेष प्रयत्न केले जाणार आहेत.
आशा सेविकांची महत्त्वाची भूमिका
या मोहिमेची जबाबदारी थेट आशा सेविकांवर देण्यात आली असून,
- नवीन कार्ड नोंदणीसाठी 20 रुपये,
- कार्ड वितरणासाठी 10 रुपये मानधन देण्यात येणार आहे.
येत्या दोन दिवसांत सर्व आशा सेविकांचे लॉग-इन आयडी सक्रिय करण्यात येणार असून, नोंदणीसाठी लाभार्थ्यांच्या याद्या थेट त्यांना उपलब्ध करून दिल्या जाणार आहेत.
सर्व यंत्रणा एकत्रितपणे राबवणार मोहिम
डिसेंबर महिन्यात ही विशेष मोहिम
- तालुका आरोग्य अधिकारी,
- वैद्यकीय अधिकारी,
- सामुदायिक आरोग्य अधिकारी,
- ग्रामसेवक
यांच्या संयुक्त सहकार्याने राबविण्यात येणार आहे.
शिधापत्रिकेशी नोंद आवश्यक
गोल्डन कार्डचा लाभ शिधापत्रिकेच्या आधारे दिला जात असल्याने,
- शिधापत्रिकेत नाव नसेल तर ती आधी अद्ययावत करावी,
- त्यानंतर 60 दिवसांत लाभार्थ्याचे नाव यादीत समाविष्ट होणार असल्याची माहिती देण्यात आली.
उत्कृष्ट आशा सेविकांचा सन्मान
या बैठकीत गोल्डन कार्ड नोंदणीमध्ये उल्लेखनीय कामगिरी करणाऱ्या आशा सेविकांचा जिल्हा प्रशासनाच्या वतीने गौरव करण्यात आला. त्यांच्या या योगदानामुळे जिल्ह्यातील नोंदणी प्रक्रियेला मोठी चालना मिळाल्याचे प्रशासनाने स्पष्ट केले.
👉 नागरिकांसाठी आवाहन:
डिसेंबर महिन्यात सुरू असलेल्या या विशेष मोहिमेचा लाभ घेऊन प्रत्येक पात्र नागरिकांनी आपले गोल्डन कार्ड लवकरात लवकर तयार करून घ्यावे, असे आवाहन जिल्हा प्रशासनाच्या वतीने करण्यात आले आहे.
