बडनेरा जुनवस्ती हादरली! फुटाणे विक्रीच्या वादातून २७ वर्षीय तरुणाचा निर्घृण खून; चार आरोपी पोलिसांच्या ताब्यात

अमरावती, 26 नोव्हेंबर 2025

बडनेरा जुनवस्तीतील सावता मैदानावर फुटाणे विक्रीच्या किरकोळ वादातून एका तरुणाचा थरकाप उडवणारा खून झाल्याने परिसरात भीतीचं वातावरण पसरलं आहे. रेल्वेगाड्यांमध्ये चणे-फुटाणे विक्री करणाऱ्या ऋषी राजू खापेकर (वय 27) याला चार जणांनी घेरून सपासप चाकूने वार करत ठार मारलं. आरोपींपैकी एक प्रौढ असून तिघे अल्पवयीन आहेत.

घटनेचं स्वरूप
काही दिवसांपासून फुटाणे कोणत्या डब्यात विकायचे, ग्राहक कोणाच्या भागात जातात, या मुद्द्यावरून ऋषी आणि आरोपी यांच्यात वाद सुरू होता. पोलिसांच्या तपासात हेही समोर आलं की, रेल्वेतील विक्रीच्या क्षेत्रावरून अनेकदा भांडणं झाली होती.

मंगळवारी रात्री आरोपी शेख तौफीक शेख शकूर (वय 21) आणि त्याच्यासोबतचे तीन अल्पवयीन साथीदार यांनी सावता मैदानात पूर्वनियोजित रीत्या ऋषीला घेरले. आधी शिवीगाळ आणि मारहाण केल्यानंतर अचानक चौघांनी एकत्र येत ऋषीवर चाकूचे वार सुरू केले. गंभीर जखमांमुळे त्याचा घटनास्थळीच मृत्यू झाला.

घटनास्थळी तणाव, पोलिस स्टेशनला नागरिकांची धाव

खुनाच्या वार्तेने परिसरात प्रचंड खळबळ उडाली. मृतकाच्या नातेवाईकांसह मोठ्या संख्येने नागरिकांनी बडनेरा पोलीस ठाण्यावर धाव घेतली.
मुख्य आरोपींना कठोर शिक्षा देण्याची आणि तातडीने कारवाई करण्याची मागणी नागरिकांनी केली.

पोलिसांची कारवाई

चारही आरोपींना पोलीसांनी ताब्यात घेतले असून पुढील तपास डीसीपी गणेश शिंदे यांच्या मार्गदर्शनाखाली सुरू आहे.

वाढत्या अल्पवयीन गुन्हेगारीचा प्रश्न ऐरणीवर

या घटनेमुळे अल्पवयीन मुलांमधील वाढत्या गुन्हेगारीचा मुद्दा पुन्हा एकदा समोर आला असून समाजात चिंता व्यक्त केली जात आहे.