यवतमाळ | तारांच्या कुंपणात अडकलेल्या बिबट्याची वनविभागाच्या धाडसी प्रयत्नांतून सुटका
यवतमाळ जिल्ह्यातील जांब वर्तुळात एका नर बिबट्याचा जीव वनविभागाच्या तत्परतेमुळे वाचला आहे. बोरगाव परिसरातील शेतात तारांच्या कुंपणात हा बिबट्या अडकलेला आढळल्याने ग्रामस्थांमध्ये एकच खळबळ उडाली होती. शेतकऱ्यांनी शनिवारी सकाळी ही घटना पाहताच तात्काळ वनविभागाला कळविले.
माहिती मिळताच रेस्क्यू पथक काही मिनिटांत घटनास्थळी दाखल झाले. पाहणी केली असता बिबट्याचा पाय आणि पोटाभोवती तार घट्ट अडकली होती आणि सुटण्याच्या प्रयत्नात त्याच्या पोटाला खोल जखम झाल्याचे आढळून आले. परिस्थिती अत्यंत नाजूक असतानाही वनकर्मचाऱ्यांनी कौशल्य आणि धैर्य दाखवत कोणताही डार्ट न वापरता शांतपणे बचावकार्य सुरू केले. कोणतीही अतिरिक्त इजा न होता तारांची कापणी करून बिबट्याला सुरक्षित सुटवण्यात आले.
नंतर जागेवरच त्याला प्राथमिक उपचार देण्यात आले. त्याची प्रकृती सुधारत असली तरी अधिक तपासणी आणि उपचारांसाठी त्याला वर्धा येथील रेस्क्यू सेंटरमध्ये हलविण्यात येत आहे. पूर्णपणे बरे झाल्यानंतर बिबट्याला पुन्हा त्याच्या नैसर्गिक अधिवासात सोडले जाणार आहे.
दरम्यान, वनविभागाने नागरिकांना आवाहन केले आहे की, अशा घटना आढळल्यास तात्काळ माहिती द्यावी, तसेच रेस्क्यूदरम्यान जमाव जमवणे किंवा व्हिडिओ करण्याचे टाळावे, ज्यामुळे वन्यजीव आणि कर्मचाऱ्यांचे काम अधिक सुरक्षित आणि सुलभ होईल.
