नागपूरमध्ये म्हाडाच्या फ्लॅटच्या नावाखाली करोडोंची फसवणूक, आरोपी फरार – सीताबर्डी पोलीस स्टेशनमध्ये गुन्हा दाखल
नागपूर शहरात म्हाडाचे स्वस्त दरातील फ्लॅट मिळवून देण्याच्या नावाखाली अनेक नागरिकांची करोडो रुपयांनी फसवणूक झाल्याचा धक्कादायक प्रकार समोर आला आहे. या प्रकरणी सीताबर्डी पोलीस ठाण्यात गुन्हा दाखल करण्यात आला असून आरोपी फरार आहे. वरिष्ठ पोलीस निरीक्षक विठ्ठलसिंग राजपूत यांनी याबाबत माहिती दिली.
पोलिसांनी दिलेल्या माहितीनुसार, आरोपीने स्वतःकडे मोठ्या प्रमाणात म्हाडाच्या योजना अंतर्गत उपलब्ध फ्लॅट असल्याचे सांगून अनेक नागरिकांना विश्वासात घेतले. कमी दरात त्वरित फ्लॅट मिळवून देण्याचे आश्वासन देत विविध लोकांकडून मोठी रक्कम जमा करण्यात आली.
तक्रारदारांच्या म्हणण्यानुसार, मागील काही महिन्यांत आरोपीने अनेक व्यक्तींसोबत स्वतंत्र व्यवहार करत लाखो-करोडो रुपयांचे व्यवहार केले. मात्र पैसे घेतल्यानंतर फ्लॅटचे वाटप न करता आरोपी गायब झाला.
सीताबर्डी पोलिसांनी आरोपीविरुद्ध फसवणुकीचा गुन्हा दाखल करून तपास सुरू केला आहे. संपूर्ण आर्थिक व्यवहारांची तपासणी केली जात असून आणखी कुणाची फसवणूक झाली आहे का, याचा शोध घेतला जात आहे.
