“मराठी एकजूट तोडण्यासाठी फडणवीसांचे राजकारण!” — संजय राऊतांचा गंभीर आरोप

“मुंबई ही मराठी माणसाची आहे, आंदोलन करण्याचा त्यांना पूर्ण अधिकार आहे!” — संजय राऊत

मुंबई : मराठा आरक्षणासाठी मुंबईकडे निघालेल्या मनोज जरांगे पाटील यांच्या मोर्चाच्या पार्श्वभूमीवर शिवसेना (उद्धव बाळासाहेब ठाकरे) नेते संजय राऊत यांनी राज्याचे उपमुख्यमंत्री देवेंद्र फडणवीस यांच्यावर जोरदार टीका केली आहे. त्यांनी फडणवीसांवर मराठी समाजाची एकजूट तोडण्याचे राजकारण केल्याचा आरोप केला.

“फडणवीसांनी सत्तेसाठी मराठी एकतेला तडा दिला”

संजय राऊत म्हणाले,

“बाळासाहेब ठाकरे यांनी मराठा, ब्राह्मण, कोकणी, घाटी, 92-96 कुळी मराठी समाजाला एकत्र आणलं. मात्र गेल्या 10 वर्षांमध्ये फडणवीसांनी जातींमध्ये फूट पाडण्याचं राजकारण केलं. त्यांनी केवळ सत्तेसाठी मराठी एकतेचा संहार केला.”

“मनोज जरांगे यांचा मोर्चा — सरकारने संवाद साधा”

राऊत म्हणाले की, जरांगे पाटील यांचा मोर्चा कोणत्याही परदेशी राष्ट्रपतीकडे नाही, तर मुख्यमंत्री आणि पंतप्रधानांकडे त्यांच्या हक्कांसाठी आहे.

“जरांगे ट्रम्पकडे मागण्या करणार नाहीत. त्यांना सरकारकडेच मागण्या कराव्या लागतील. त्यामुळे त्यांच्याशी सरकारने संवाद साधणे गरजेचे आहे,” असे ते म्हणाले.

“कबुतरांसाठी आंदोलन चालतं, मग मराठी माणूस मागण्या का करू नये?”

संजय राऊत यांनी उपरोधिक टीका करत म्हटले की,

“मुंबई ही मराठी माणसाची आहे. जर कबुतरांसाठी आंदोलन होऊ शकते आणि त्याला परवानगी मिळते, तर मराठी माणूस जर आरक्षणासाठी आंदोलन करत असेल तर त्यात गैर काय?”

मनोज जरांगे पाटील यांचा मोर्चा: काय, केव्हा, कुठे?

प्रारंभ: 27 ऑगस्ट 2025, अंतरवाली सराटी, जालना

उद्दिष्ट: ओबीसी कोट्यात मराठा आरक्षण, ‘सगे-सोयरे’ धोरणाची अंमलबजावणी

समारोप: 29 ऑगस्ट 2025, मुंबईतील आझाद मैदान

प्रकार: बेमुदत उपोषण

“मराठी आंदोलनांना थांबवू नका” — राऊत यांची भूमिका

गणेशोत्सवाच्या पार्श्वभूमीवर कायदा आणि सुव्यवस्था राखणे गरजेचे असले तरी, मराठी माणसाला त्यांच्या मागण्यांसाठी मुंबईत येण्यापासून थांबवू नये, अशी भूमिका राऊत यांनी स्पष्टपणे मांडली..