जॉली एलएलबी ३’ वादात; अक्षय कुमार-अर्शद वारसीला पुणे न्यायालयाचा समन्स!वकील आणि न्यायाधीशांचा विनोदी चित्रण महागात पडणार? जाणून घ्या नेमकं प्रकरण

पुणे : अक्षय कुमार आणि अर्शद वारसी यांच्या बहुप्रतिक्षित ‘जॉली एलएलबी ३’ या चित्रपटावर प्रदर्शनापूर्वीच कायदेशीर संकट ओढवलं आहे. पुण्यातील वकिलांनी चित्रपटात वकिलांचा अवमान केल्याचा आरोप करत न्यायालयात याचिका दाखल केली आहे. न्यायालयाने या प्रकरणाची गंभीर दखल घेत दोन्ही प्रमुख अभिनेत्यांना 28 ऑगस्ट 2025 रोजी कोर्टात हजर राहण्याचे आदेश दिले आहेत.

काय आहे नेमकं प्रकरण?

चित्रपटाचा टीझर 12 ऑगस्ट 2025 रोजी प्रदर्शित झाला. या टीझरमध्ये अक्षय कुमार आणि अर्शद वारसी वकिलांचा बँड (गणवेश) परिधान करून विनोदी अंदाजात प्रमोशन करताना दिसत आहेत. यावर आक्षेप घेत ॲड. वाजेद खान (बिडकर) आणि ॲड. गणेश म्हस्के यांनी पुण्याच्या दिवाणी न्यायालयात याचिका दाखल केली आहे.

त्यांनी असा दावा केला आहे की, चित्रपटातील अश्लील किंवा असभ्य विनोदांमुळे वकिली व्यवसायाची प्रतिमा डागाळली जात आहे. यामुळे प्रमोशन आणि चित्रपटाच्या प्रदर्शनावर बंदी आणण्याची मागणी त्यांनी केली आहे.

न्यायालयाचा आदेश काय?

पुणेतील 12 वे कनिष्ठ दिवाणी न्यायाधीश जे. जी. पवार यांनी या याचिकेवर सुनावणी करत R.C.S. क्रमांक 878/2024 अंतर्गत केस स्वीकारली. अक्षय कुमार, अर्शद वारसी तसेच निर्मात्यांना कोर्टात हजर राहण्याचे समन्स बजावण्यात आले आहेत.

‘जॉली एलएलबी’ मालिकेची पार्श्वभूमी

‘जॉली एलएलबी’ या मालिकेचा पहिला भाग 2013 मध्ये आणि दुसरा भाग 2017 मध्ये प्रदर्शित झाला होता.

आगामी तिसऱ्या भागात अक्षय कुमार (जगदीश्वर मिश्रा) आणि अर्शद वारसी (जगदीश त्यागी) या दोन वकीलांची कोर्टातील टक्कर पाहायला मिळणार आहे.

सुभाष कपूर दिग्दर्शित या भागात सौरभ शुक्ला, हुमा कुरेशी आणि अमृता राव यांच्याही भूमिका आहेत.

चित्रपटाचे प्रदर्शन 19 सप्टेंबर 2025 रोजी निश्चित करण्यात आले आहे.

अजमेरनंतर पुण्यातही आक्षेप

या वादावर आधीही प्रतिक्रिया उमटल्या होत्या. अजमेरमधील वकिलांनी देखील चित्रपटातील न्यायव्यवस्थेच्या चित्रणावर नाराजी व्यक्त केली होती. आता पुणे कोर्टाच्या समन्समुळे चित्रपटाच्या प्रदर्शनावर गंडांतर येण्याची शक्यता आहे.

चित्रपटात वकिलांची प्रतिमा हलक्याफुलक्या विनोदांद्वारे सादर केल्याने वकिलांचा अवमान झाल्याचा आरोप ॲड. वाजेद खान आणि ॲड. गणेश म्हस्के यांनी केला आहे.

▪️ न्यायालयाचा काय आदेश आहे?

पुण्याच्या कनिष्ठ दिवाणी न्यायालयाने 28 ऑगस्ट 2025 रोजी कोर्टात हजर राहण्याचे आदेश अक्षय कुमार आणि अर्शद वारसी यांना दिले आहेत.

▪️ चित्रपटाची कथा आणि प्रदर्शनाबाबत काय माहिती आहे?

दोन वकिलांची कोर्टातली टक्कर, विनोदी आणि सामाजिक भाष्य असलेली कथा, 19 सप्टेंबर 2025 रोजी प्रदर्शित होणार. मात्र वादामुळे प्रदर्शन अडचणीत येऊ शकते.