लातूर-औसा रस्त्यावर बसचा भीषण अपघात; ३० ते ५० प्रवासी जखमी
लातूर: लातूर-औसा मार्गावर औसा तालुक्यातील बुधोडा गावाजवळ एका बसचा भीषण अपघात झाला आहे. या अपघातात बसमधील ३० ते ५० प्रवासी जखमी झाले आहेत. सुदैवाने, या घटनेत कोणतीही जीवितहानी झाली नाही किंवा कुणालाही गंभीर दुखापत झालेली नाही.
नेमकं काय घडलं?
गुरुवारी दुपारी १२ वाजण्याच्या सुमारास लातूरहून तुळजापूरकडे जाणारी बस क्रमांक MH 20 B 2802 बुधोडा गावाजवळून जात होती. त्याचवेळी, समोरून येणाऱ्या एका ‘काली-पिली’ टॅक्सीने अचानक उड्डाणपुलावर चढण्यासाठी वळण घेतले. टॅक्सी चालकाच्या या निष्काळजीपणामुळे बस चालकाचे नियंत्रण सुटले आणि बस रस्त्याच्या कडेला असलेल्या फूटपाथवर आदळली.
या अपघातात बसमधील अनेक प्रवासी जखमी झाले. अपघाताची माहिती मिळताच औसा पोलिसांनी तात्काळ घटनास्थळी धाव घेतली. जखमींना तातडीने जवळच्या रुग्णालयात दाखल करण्यात आले आहे. पोलिसांनी या घटनेचा पंचनामा केला असून, पुढील तपास सुरू आहे.
