अमरावती : भारताचे सरन्यायाधीश न्या. भूषण रामकृष्ण गवई यांचे आज अमरावती विमानतळावर आगमन झाले. या आगमनप्रसंगी जिल्ह्यातील प्रमुख राजकीय, प्रशासनिक आणि पोलीस अधिकारी उपस्थित होते. सरन्यायाधीश न्या. गवई यांचे पुष्पगुच्छ देऊन औपचारिक स्वागत करण्यात आले.
स्वागतासाठी मान्यवरांची उपस्थिती
विमानतळावर सरन्यायाधीश न्या. गवई यांचे स्वागत खासदार बळवंत वानखडे, विभागीय आयुक्त श्वेता सिंघल, विशेष पोलीस महानिरीक्षक रामनाथ पोकळे, माहिती आयुक्त रवींद्र ठाकरे, जिल्हाधिकारी आशिष येरेकर, पोलीस आयुक्त अरविंद चावरिया, मनपा आयुक्त सौम्या शर्मा, पोलीस अधीक्षक विशाल आनंद, तसेच मुख्य कार्यकारी अधिकारी संजिता महापात्र यांच्या प्रमुख उपस्थितीत करण्यात आले.
संविधान उद्देशिकेची खास भेट
या प्रसंगी विभागीय आयुक्त श्रीमती श्वेता सिंघल यांनी सरन्यायाधीश न्या. भूषण गवई यांना लाकडावर कोरलेली भारताचे संविधानातील उद्देशिका भेट म्हणून अर्पण केली. ही भेट संविधानाच्या मूल्यांचा सन्मान करणारी आणि न्यायव्यवस्थेच्या सर्वोच्च पदावर विराजमान असलेल्या न्या. गवई यांना दिलेला विशेष सन्मान मानला जात आहे.
