यवतमाळ : राज्य शासनाच्या महत्त्वाकांक्षी महाराष्ट्र शक्तिपीठ महामार्ग प्रकल्पाला सुरुवात झाली असून, यवतमाळ जिल्ह्यातील आर्णी तालुक्यात संयुक्त मोजणी प्रक्रिया पूर्ण करण्यात आली आहे. पवनार ते पत्रादेवी या महामार्गाची एकूण लांबी ८०२ किलोमीटर असून, त्यातील १३७ किलोमीटरचा भाग यवतमाळ जिल्ह्यातून जाणार आहे.
१६ गावांमधून भूसंपादनाचे काम मार्गी
यवतमाळ उपविभागातील आर्णी तालुक्यातील १६ गावांमधून शक्तिपीठ महामार्गासाठी भूसंपादन करण्यात येणार आहे. या प्रक्रियेत लोणबेहल येथून १६ एप्रिलपासून संयुक्त मोजणीला सुरुवात झाली होती आणि ती यशस्वीपणे पूर्ण झाली आहे.
विभागीय समन्वयात प्रक्रिया पूर्ण
संयुक्त मोजणीच्या वेळी महसूल विभाग, भूमी अभिलेख, वन विभाग, सार्वजनिक बांधकाम विभाग, आणि कृषी विभाग यांचे प्रतिनिधी उपस्थित होते. सर्व संबंधित विभागांच्या समन्वयातून मोजणी पार पडली असून, पुढील भूसंपादन आणि बांधकाम प्रक्रियेचा मार्ग मोकळा झाला आहे.
