मुंबईत मंत्र्यांना जाब विचारणाऱ्या महिलेवरच आरोप; ‘चेंगराचेंगरी घडवण्याचा प्रयत्न’ असल्याची तक्रार
मुंबईतील वांद्रे-वर्ली सी-लिंककडे जाणाऱ्या महत्त्वाच्या मार्गावर झालेल्या भाजपच्या आंदोलनादरम्यान मंत्र्यांना जाब विचारणाऱ्या महिलेवरच आता गंभीर आरोप करण्यात आले आहेत. आंदोलनामुळे निर्माण झालेल्या वाहतूक कोंडीवर प्रश्न उपस्थित करणाऱ्या महिलेविरोधात वर्ली पोलिस ठाण्यात तक्रार दाखल करण्यात आली असून, तिने जाणीवपूर्वक चेंगराचेंगरीसारखी परिस्थिती निर्माण करण्याचा प्रयत्न केल्याचा दावा तक्रारदाराने केला आहे.
मिळालेल्या माहितीनुसार, मुंबईतील एका महत्त्वाच्या रस्त्यावर भाजपकडून आंदोलन आयोजित करण्यात आले होते. या आंदोलनामुळे वाहतुकीवर मोठा परिणाम झाला आणि नागरिकांना प्रचंड मनस्ताप सहन करावा लागला. याच दरम्यान एका महिलेने थेट महाराष्ट्रातील मंत्र्यांना जाब विचारत, आंदोलन रस्त्यावर न करता शेजारच्या मोकळ्या मैदानात घ्यावे, अशी मागणी केली होती. या घटनेचा व्हिडिओ सोशल मीडियावर मोठ्या प्रमाणात व्हायरल झाला होता.
दरम्यान, शुक्रवारी एका तरुणीने वर्ली पोलिस ठाण्यात जाऊन या अज्ञात महिलेविरोधात एफआयआर दाखल करण्याची मागणी केली. तक्रारदार तरुणीने आपल्या चार पानी तक्रारीत दावा केला की, संबंधित महिला वाहतूक कोंडीमुळे प्रत्यक्षात अडचणीत नव्हती, मात्र राष्ट्रीय माध्यमांचे लक्ष वेधण्यासाठी तिने जाणीवपूर्वक आक्रमक भूमिका घेतली. तसेच तिच्या वर्तनामुळे गर्दीत गोंधळ आणि चेंगराचेंगरीची शक्यता निर्माण झाली होती, असा गंभीर आरोपही करण्यात आला आहे.
दुसरीकडे, या संपूर्ण प्रकरणात मुंबई पोलिसांनी भाजपच्या आंदोलन आयोजकांवरही कारवाई केली आहे. आंदोलनासाठी घालून दिलेल्या अटींचे उल्लंघन केल्याप्रकरणी आयोजकांविरोधात गुन्हा दाखल करण्यात आला आहे. पोलिसांच्या या कारवाईमुळे प्रकरणाला नवे वळण मिळाले आहे.
एका बाजूला वाहतूक कोंडीमुळे संतप्त झालेल्या महिलेचा आवाज, तर दुसऱ्या बाजूला तिच्याविरोधातील गंभीर तक्रार… यामुळे हे प्रकरण आता केवळ आंदोलनापुरते मर्यादित न राहता कायदेशीर आणि राजकीय वादात परिवर्तित झाले आहे.
मुंबईतील या प्रकरणामुळे सार्वजनिक आंदोलन, नागरिकांचा त्रास आणि अभिव्यक्ती स्वातंत्र्य या तिन्ही मुद्द्यांवर नवा वाद पेटला असून, पुढे पोलिस काय भूमिका घेतात याकडे सर्वांचे लक्ष लागले आहे.
