अमेरिका-इस्रायलच्या इराणवरील हल्ल्यावर रशियाची टीका; “बेकायदेशीर, अन्यायकारक आणि अमानुष”
रशियाने अमेरिका आणि इस्रायल यांच्या इराणविरोधातील कारवाईचा तीव्र निषेध नोंदवला आहे. या संघर्षामुळे जागतिक अस्थिरता वाढण्याचा इशारा देण्यात आला आहे.
नवी दिल्लीतील रशियन दूतावासाचे कार्यवाह प्रमुख रोमन बाबुश्किन यांनी या संघर्षाला “बेकायदेशीर, अन्यायकारक आणि अमानुष” असे संबोधले. “या संकटाचा कोणालाही फायदा होत नाही,” असेही त्यांनी स्पष्ट केले.
या संघर्षामुळे जागतिक ऊर्जा बाजारात मोठी अनिश्चितता निर्माण झाली असून तेलाच्या किंमतीत चढ-उतार होत आहेत. विशेषतः स्ट्रेट ऑफ हॉरमुजसारख्या महत्त्वाच्या पुरवठा मार्गांवर परिणाम होण्याची भीती व्यक्त करण्यात आली आहे.
NDTV सोबतच्या संवादात बाबुश्किन यांनी सांगितले की, या परिस्थितीमुळे जागतिक ऊर्जा पुरवठा साखळीवर गंभीर परिणाम होत आहे. दरम्यान, भारताने रशियाकडून आयात होणाऱ्या तेलात या महिन्यात सुमारे ४५ टक्क्यांनी वाढ झाल्याची माहिती समोर आली आहे.
रशियाला या परिस्थितीत फायदा होत असल्याच्या चर्चेला फेटाळून लावत त्यांनी सांगितले, “कोणालाही याचा फायदा होत नाही. वाढलेले तेल दर स्थानिक, प्रादेशिक आणि राष्ट्रीय बाजारपेठांसाठीही धोकादायक ठरत आहेत.”
तसेच भारत आणि रशिया या दोन्ही देशांचे स्थिर पुरवठा साखळी, स्थिर किंमत धोरण आणि पारदर्शक व्यापार नियमांवर एकमत असल्याचे त्यांनी अधोरेखित केले.
