यवतमाळ मध्ये वनविभागाची मोठी चूक; माकडाऐवजी नागरिकालाच लागलं बेशुद्धीचं इंजेक्शन
यवतमाळ जिल्ह्यातून एक धक्कादायक आणि चिंताजनक घटना समोर आली आहे. पिसाळलेल्या माकडाला पकडण्यासाठी आलेल्या वनविभागाच्या पथकाकडून मोठी चूक झाली असून, माकडाऐवजी एका निरपराध नागरिकालाच ट्रॅन्क्विलायझर इंजेक्शन लागलं आहे.
ही घटना भवानी, उमरखेड येथे मंगळवारी दुपारी १ वाजताच्या सुमारास घडली. गेल्या काही दिवसांपासून परिसरात एका पिसाळलेल्या माकडाने नागरिकांमध्ये भीतीचं वातावरण निर्माण केलं होतं. अनेकांवर हल्ले झाल्यामुळे ग्रामस्थांनी वनविभागाला पाचारण केलं.
मंगळवारी वनविभागाचं पथक घटनास्थळी दाखल झालं आणि माकडाला पकडण्यासाठी रेस्क्यू ऑपरेशन सुरू करण्यात आलं. ट्रॅन्क्विलायझर गनच्या सहाय्याने माकडाला बेशुद्ध करण्याचा प्रयत्न करण्यात आला.
मात्र, माकडाच्या अचानक हालचालीमुळे शूटरचा निशाणा चुकला आणि गनमधून सुटलेला डार्ट थेट गर्दीत उभ्या असलेल्या सदानंद खराटे (वय ४५, रा. डोंगरगाव) यांच्या अंगावर जाऊन लागला.
इंजेक्शन लागताच खराटे जखमी झाले आणि काही क्षणांतच परिसरात खळबळ उडाली. या घटनेनंतर संतप्त नागरिकांनी वनविभागाच्या कारवाईवर नाराजी व्यक्त केली, ज्यामुळे काही काळ तणावाचे वातावरण निर्माण झाले.
जखमी सदानंद खराटे यांना तातडीने प्राथमिक आरोग्य केंद्र, कोरटा येथे दाखल करण्यात आले. सध्या त्यांची प्रकृती स्थिर असल्याची माहिती वैद्यकीय सूत्रांनी दिली आहे.
दरम्यान, वनविभागाच्या अधिकाऱ्यांनी या घटनेबद्दल दिलगिरी व्यक्त केली असून गर्दी आणि माकडाच्या अनपेक्षित हालचालीमुळे हा अपघात झाल्याचं स्पष्ट केलं आहे. भविष्यात अशा कारवायांमध्ये अधिक सुरक्षितता उपाययोजना राबवण्याचं आश्वासनही देण्यात आलं आहे.
माकडाला पकडण्याच्या मोहिमेत झालेल्या या गंभीर चुकीमुळे एका निरपराध नागरिकाला फटका बसला आहे. अशा घटनांची पुनरावृत्ती टाळण्यासाठी अधिक काटेकोर सुरक्षा उपायांची गरज असल्याचं स्पष्ट होत आहे.
