Kanpur देहातमध्ये भीषण अपघात; दोन तरुणांचा मृत्यू, होळीपूर्वी गावावर शोककळा

कानपूर : होळीच्या सणाआधीच उत्तर प्रदेशातील कानपूर देहात जिल्ह्यातील एका भीषण रस्ता अपघाताने दोन कुटुंबांवर दुःखाचा डोंगर कोसळला आहे. रसूलाबाद पोलीस ठाणे हद्दीतील मेघजाल गावासमोर दोन दुचाकींची समोरासमोर धडक होऊन दोन तरुणांचा जागीच मृत्यू झाला, तर एक जण गंभीर जखमी झाला आहे.

मिळालेल्या माहितीनुसार, भरधाव वेगात येणाऱ्या दोन मोटारसायकली अचानक समोरासमोर धडकल्या. ही धडक इतकी भीषण होती की दोन्ही दुचाकीस्वारांचा घटनास्थळीच मृत्यू झाला. अपघातात तिसरा युवक गंभीर जखमी झाला असून त्याला तातडीने जवळच्या रुग्णालयात दाखल करण्यात आले.

प्राथमिक उपचारानंतर त्याची प्रकृती चिंताजनक असल्याने डॉक्टरांनी त्याला पुढील उपचारांसाठी कानपूर येथे रेफर केले आहे.

घटनेची माहिती मिळताच पोलिसांनी तात्काळ घटनास्थळी धाव घेतली. दोन्ही मृतदेह ताब्यात घेऊन शवविच्छेदनासाठी पाठवण्यात आले असून अपघातग्रस्त दुचाकीही जप्त करण्यात आल्या आहेत. या प्रकरणाचा पुढील तपास सुरू असल्याची माहिती पोलिसांनी दिली.

या दुर्दैवी घटनेमुळे परिसरात शोककळा पसरली आहे. होळीच्या आनंदोत्सवापूर्वीच दोन घरांचे चिराग विझल्याने गावात हळहळ व्यक्त होत आहे.