बोलिव्हियामध्ये लष्करी विमान कोसळले; किमान १५ ठार, नोटा लुटण्याच्या प्रयत्नात गोंधळ

एल आल्टो (प्रतिनिधी) – बोलिव्हियामध्ये लष्कराचे मालवाहू विमान कोसळल्याने किमान १५ जणांचा मृत्यू झाला असून अनेक जण जखमी झाले आहेत. ही दुर्घटना पश्चिमेकडील El Alto शहरात घडली, अशी माहिती अधिकाऱ्यांनी दिली.

शुक्रवारी सायंकाळी ६:१५ वाजता (स्थानिक वेळेनुसार) हे विमान Santa Cruz येथून एल आल्टो विमानतळाकडे येत असताना अपघातग्रस्त झाले. विमान धावपट्टीवरून घसरत बाहेर गेले आणि जवळील वाहनांवर आदळल्याचे सांगितले जात आहे.

संरक्षण मंत्रालयाने पुष्टी केली की, अपघातग्रस्त विमान हे C-130 Hercules होते आणि ते Central Bank of Bolivia साठी चलनी नोटा वाहतूक करत होते. विमानात एकूण आठ जण होते, अशी माहिती वायुसेना प्रमुखांनी दिली.

नोटा लुटण्याचा प्रयत्न; पोलिसांची अश्रुधुराचा मारा

अपघातानंतर घटनास्थळी मोठी गर्दी जमली. विखुरलेल्या नोटा लुटण्याचा प्रयत्न करणाऱ्या जमावाला पांगवण्यासाठी पोलिसांना अश्रुधुराचा मारा करावा लागला. काही व्हिडिओंमध्ये पोलिस ढाल घेऊन उभे असल्याचे, तर जमावाकडून दगडफेक होत असल्याचे दिसत आहे.

अपघाताचे वृत्तांकन करत असलेल्या पत्रकारांवरही हल्ला झाल्याची माहिती समोर आली आहे. National Association of Journalists of Bolivia यांनी निवेदनात म्हटले आहे की, “वाहून नेण्यात येत असलेल्या पैशांची चोरी करण्याचा प्रयत्न करणाऱ्या काही व्यक्तींनी वृत्तांकन करणाऱ्या पत्रकारांवर अत्यंत हिंसक हल्ले केले.” एका मोबाईल टीव्ही युनिटला थेट लक्ष्य करण्यात आले असून काही पत्रकार दगडफेकीत गंभीर जखमी झाले आहेत.

सरकारी वृत्तसंस्था Bolivian News Agency यांनी दिलेल्या माहितीनुसार, नोटा लुटण्याच्या प्रयत्नात किमान डझनभर लोकांना अटक करण्यात आली आहे.

या भीषण अपघातानंतर संपूर्ण परिसरात तणावपूर्ण परिस्थिती निर्माण झाली असून दुर्घटनेच्या कारणांचा तपास सुरू आहे.