अमरावती महापालिकेत संतापजनक प्रकार; महिला आयुक्तांसमोर नगरसेवकाची तक्रारदाराला शिवीगाळ
अमरावती, प्रतिनिधी :
अमरावती महानगरपालिकेच्या जनसंवाद व समस्या निवारण कार्यक्रमात आज संतापजनक प्रकार घडल्याची माहिती समोर आली आहे. रहाटगाव प्रभागातील अतिक्रमणाच्या तक्रारीवरून नवनियुक्त नगरसेवक चंदू खेडकर यांनी तक्रारदार नागरिकाशी महिला आयुक्तांच्या उपस्थितीत कथितरित्या अशोभनीय वर्तन केल्याचा आरोप आहे. या घटनेमुळे महापालिकेत खळबळ उडाली असून लोकप्रतिनिधींच्या वर्तणुकीवर प्रश्नचिन्ह उपस्थित होत आहे.
नेमकी घटना काय?
महापालिकेत नागरिकांच्या समस्या सोडवण्यासाठी ‘जनसंवाद’ कार्यक्रमाचे आयोजन करण्यात आले होते. यावेळी रहाटगाव प्रभागातील अतिक्रमणाबाबत काही नागरिक तक्रार घेऊन उपस्थित होते. याच दरम्यान नगरसेवक चंदू खेडकर आणि तक्रारदार यांच्यात वाद झाल्याचे सांगितले जात आहे. उपस्थितांच्या म्हणण्यानुसार, वाद वाढत जाऊन नगरसेवकांनी आक्षेपार्ह शब्दप्रयोग केल्याचा आरोप आहे.
या प्रसंगी सौम्या शर्मा उपस्थित होत्या. त्यांच्या समोरच हा प्रकार घडल्याने अधिकारी आणि नागरिक आश्चर्यचकित झाले.
पहिल्याच कार्यकाळात वाद
चंदू खेडकर हे पहिल्यांदाच नगरसेवक म्हणून निवडून आले आहेत. मात्र, जनतेच्या समस्या मांडण्यासाठी आलेल्या नागरिकाशी झालेल्या या कथित वादामुळे त्यांच्या कार्यपद्धतीवर टीका होत आहे. महिला अधिकाऱ्यांच्या उपस्थितीत अशा प्रकारचे वर्तन झाल्याच्या आरोपामुळे राजकीय वर्तुळात चर्चा सुरू झाली आहे.
दरम्यान, या घटनेबाबत नगरसेवक चंदू खेडकर यांची अधिकृत प्रतिक्रिया मिळू शकली नाही. प्रशासनाकडून या प्रकरणाची चौकशी होणार का, याकडे सर्वांचे लक्ष लागले आहे.
महापालिकेच्या जनसंवाद कार्यक्रमात घडलेल्या या प्रकारामुळे लोकशाही प्रक्रियेच्या शिस्तीबाबत प्रश्न निर्माण झाले आहेत. प्रशासन या प्रकरणाची दखल घेऊन योग्य ती कारवाई करणार का, हे पाहणे आता महत्त्वाचे ठरणार आहे.
