अमरावती महानगरपालिकेत Adv. प्रशांत देशपांडे स्वीकृत नगरसेवक

भाजपाकडून नियुक्ती; तीन दशकांच्या सामाजिक-कायदेशीर कार्याची दखल

अमरावती, दि. २० फेब्रुवारी : अमरावती महानगरपालिकाच्या पहिल्याच आमसभेत भारतीय जनता पक्षच्या वतीने ज्येष्ठ विधिज्ञ व समाजसेवक अॅडव्होकेट प्रशांत विजयराव देशपांडे यांची स्वीकृत नगरसेवक म्हणून नियुक्ती करण्यात आली. त्यांच्या निवडीमुळे शहरात समाधानाचे वातावरण व्यक्त होत आहे.

कुटुंबाची राजकीय परंपरा

अॅड. देशपांडे यांना सामाजिक व राजकीय परंपरेचा समृद्ध वारसा लाभला आहे. त्यांचे वडील स्वर्गीय अॅड. विजयराव देशपांडे यांनी महानगरपालिकेचे प्रभारी अध्यक्ष म्हणून काम पाहिले होते. तर आई विद्याताई देशपांडे या अमरावतीच्या पहिल्या महिला महापौर म्हणून ओळखल्या जातात.

वकिली क्षेत्रातील भक्कम कारकीर्द

१९९१ साली विशेष प्राविण्यासह कायद्याची पदवी संपादन केल्यानंतर त्यांनी वकिली व्यवसायाची सुरुवात केली. गेल्या ३२ वर्षांत अमरावती जिल्ह्यात त्यांनी आपली ठोस ओळख निर्माण केली आहे. अमरावती जिल्हा वकील संघाचे सलग दोन वेळा अध्यक्षपद भूषवण्याचा मान त्यांना मिळाला आहे. तसेच जवळपास २० नवोदित वकिलांना मार्गदर्शन करून त्यांना घडविण्याचे काम त्यांनी केले आहे.

सामाजिक व सांस्कृतिक क्षेत्रात सक्रिय

कोरोना काळात गरजूंना अन्न व औषधांची मदत, पोलिसांसाठी निवारा व भोजन व्यवस्था अशा विविध सामाजिक उपक्रमांमध्ये त्यांनी पुढाकार घेतला. क्रीडा, सांस्कृतिक व धार्मिक क्षेत्रात सक्रिय सहभागासोबतच ते नाट्य निर्माता, दिग्दर्शक आणि नैपथ्यकार म्हणूनही कार्यरत असून राज्यस्तरीय पुरस्काराने सन्मानित झाले आहेत.

भाजपात विविध जबाबदाऱ्या

भारतीय जनता पक्ष विधी आघाडीचे प्रदेश उपाध्यक्ष तसेच प्रदेश कार्यकारिणीचे निमंत्रित सदस्य म्हणून त्यांनी जबाबदारी सांभाळली आहे. पक्षाच्या विविध निवडणुकांमध्ये सक्रिय सहभाग नोंदवत संघटन बळकट करण्यासाठी त्यांनी काम केले आहे.

शहराच्या विकासासाठी कटिबद्ध

स्वीकृत नगरसेवक पदाची जबाबदारी स्वीकारल्यानंतर शहरातील प्रलंबित प्रश्न सोडवण्यासाठी कटिबद्ध असल्याचे अॅड. प्रशांत देशपांडे यांनी सांगितले. त्यांच्या अनुभवाचा शहराच्या विकासकामांना नक्कीच फायदा होईल, असा विश्वास व्यक्त केला जात आहे.