अमरावती ग्रामीण पोलिस भरती २०२६: २१४ जागांसाठी २२ हजार उमेदवार मैदानात; जोग स्टेडियमवर शारीरिक चाचणीला प्रारंभ

अमरावती: जिल्हा ग्रामीण पोलिस दलातील रिक्त पदांच्या भरतीसाठी आजपासून अधिकृतरीत्या रणशिंग फुंकले गेले आहे. अमरावतीच्या प्रसिद्ध जोग स्टेडियम येथे सकाळपासूनच उमेदवारांची मोठी गर्दी पाहायला मिळाली. ग्रामीण पोलिस दलातील २१४ जागांसाठी तब्बल २२ हजार २०८ उमेदवारांनी अर्ज दाखल केले असून, आज पहिल्याच दिवशी ८०० उमेदवारांची शारीरिक क्षमता चाचणी घेण्यात आली.

मैदानात जिद्द आणि चुरस

सकाळी ५ वाजेपासूनच उमेदवार स्टेडियमवर हजर झाले होते. पहिल्या टप्प्यात पुरुष उमेदवारांची कागदपत्र पडताळणी आणि त्यानंतर शारीरिक चाचण्या पार पडल्या. यामध्ये प्रामुख्याने १६०० मीटर धावणे, गोळाफेक आणि लांब उडी अशा विविध प्रकारांत उमेदवारांच्या गुणवत्तेची कसोटी लागत आहे. एका जागेसाठी सरासरी १०० हून अधिक उमेदवार रिंगणात असल्याने मोठी चुरस निर्माण झाली आहे.

पारदर्शकतेसाठी ‘डिजिटल’ वॉच

भरती प्रक्रियेत पूर्णतः पारदर्शकता राखण्यासाठी पोलिस प्रशासनाने कंबर कसली आहे. संपूर्ण प्रकिया सीसीटीव्ही (CCTV) च्या देखरेखीखाली पार पडत असून प्रत्येक हालचालीवर वरिष्ठ अधिकाऱ्यांचे लक्ष आहे. कोणत्याही प्रकारचा वशिलेबाजी किंवा गैरप्रकार रोखण्यासाठी बायोमेट्रिक उपस्थिती आणि अत्याधुनिक तंत्रज्ञानाचा वापर केला जात आहे.

प्रशासनाची जय्यत तयारी

पोलिस अधीक्षक विशाल आनंद यांच्या मार्गदर्शनाखाली जोग स्टेडियम परिसरात कडेकोट बंदोबस्त तैनात करण्यात आला आहे. बाहेरगावावरून येणाऱ्या उमेदवारांसाठी राहण्याची आणि पिण्याच्या पाण्याची सोय प्रशासनाकडून करण्यात आली आहे.

भरतीचे महत्त्वाचे मुद्दे:

• एकूण पदे: २१४ (ज्यामध्ये महिलांसाठी ६४ पदे राखीव).
• एकूण अर्ज: २२,२०८.
• कालावधी: पुरुष उमेदवारांची चाचणी ११ ते २३ फेब्रुवारी, तर महिला उमेदवारांची २४ ते २६ फेब्रुवारी दरम्यान होईल.
• सुट्टीचे दिवस: १५ ते १९ फेब्रुवारी आणि २२ फेब्रुवारी रोजी भरती प्रक्रिया बंद राहील.

प्रशासनाचे आवाहन: उमेदवारांनी कोणत्याही अफवांवर विश्वास ठेवू नये. ही भरती प्रक्रिया पूर्णपणे पारदर्शक आणि गुणवत्तेवर आधारित आहे. कोणाही पैशांची मागणी केल्यास त्वरित लाचलुचपत प्रतिबंधक विभागाशी संपर्क साधावा.