‘आम्ही जे केलं ते बांगलादेशसाठी…’; भारताविरुद्धच्या सामन्यावरील ‘यु-टर्न’नंतर मोहसीन नक्वींचे स्पष्टीकरण, नेमकं काय घडलं?
लाहोर: टी-२० विश्वचषक २०२६ मध्ये भारत-पाकिस्तान यांच्यातील हाय-व्होल्टेज सामन्यावर असलेले अनिश्चिततेचे मळभ अखेर दूर झाले आहे. १५ फेब्रुवारी रोजी कोलंबोमध्ये होणाऱ्या या सामन्यावरील बहिष्काराचा निर्णय मागे घेत पाकिस्तानने ‘यु-टर्न’ घेतला आहे. या निर्णयानंतर पाकिस्तान क्रिकेट बोर्डाचे (PCB) अध्यक्ष मोहसीन नक्वी यांनी दिलेली प्रतिक्रिया सध्या क्रीडा विश्वात चर्चेचा विषय ठरत आहे.
नेमका वाद काय होता?
सुरक्षेच्या कारणास्तव बांगलादेशने भारतात खेळण्यास नकार दिला होता, त्यानंतर आयसीसीने बांगलादेशला स्पर्धेतून बाहेर करत त्यांच्या जागी स्कॉटलंडला संधी दिली. बांगलादेशच्या समर्थनार्थ पाकिस्तान सरकारने भारताविरुद्धच्या सामन्यावर बहिष्कार टाकण्याची धमकी दिली होती. मात्र, आयसीसीने कडक आर्थिक निर्बंधांचा इशारा दिल्यानंतर पाकिस्तानला नमते घ्यावे लागले.
मोहसीन नक्वींचे चर्चेतील विधान
पाकिस्तान सुपर लीगच्या (PSL) एका कार्यक्रमानंतर मोहसीन नक्वी यांना पत्रकारांनी या यु-टर्नबद्दल विचारले. तेव्हा त्यांनी असा दावा केला की, पाकिस्तानने जो काही लढा दिला तो केवळ बांगलादेशसाठी होता.
- नक्वी म्हणाले: “तुम्ही बांगलादेशचे विधान पाहिले असेलच. त्यांनी स्वतः पाकिस्तानला सामना खेळण्याची विनंती केली आहे. त्यांचा प्रश्न आता सुटलेला दिसतोय, म्हणूनच त्यांनी ही विनंती केली.”
- स्वतःसाठी काहीही नाही: जेव्हा त्यांना विचारले की, पाकिस्तानने या बदल्यात आयसीसीकडून काही पदरात पाडून घेतले का? त्यावर ते म्हणाले, “आम्ही बांगलादेशची बाजू घेतली होती. तो त्यांचा विषय होता, आम्ही स्वतःसाठी यात काहीही मिळवलेले नाही.”
आयसीसीने फेटाळल्या पाकिस्तानच्या मागण्या
सूत्रांच्या माहितीनुसार, पाकिस्तानने हा बहिष्कार मागे घेताना आयसीसीसमोर काही अटी ठेवल्या होत्या, ज्या आयसीसीने स्पष्टपणे फेटाळून लावल्या आहेत:
- द्विपक्षीय मालिका: भारतासोबत पुन्हा द्विपक्षीय क्रिकेट सुरू करण्याची मागणी आयसीसीने फेटाळली.
- तिरंगी मालिका: भारत-पाकिस्तान-बांगलादेश अशी तिरंगी मालिका खेळवण्याचा प्रस्तावही अमान्य करण्यात आला.
- बांगलादेशवर कारवाई नको: बांगलादेशच्या महसूल वाट्यात कपात करू नये, ही मागणी मात्र आयसीसीने आधीच मान्य केली होती.
१५ फेब्रुवारीला महामुकाबला!
आयसीसीने आपल्या निवेदनात स्पष्ट केले आहे की, सर्व सदस्य देश सहभागाच्या अटींचे पालन करतील आणि विश्वचषक यशस्वी करण्यासाठी सहकार्य करतील. या निर्णयामुळे आता १५ फेब्रुवारीला क्रिकेट चाहत्यांना पुन्हा एकदा भारत-पाकिस्तान यांच्यातील थरार पाहायला मिळणार आहे.
