T20 World Cup 2026: चॅम्पियन टीम इंडियाला कोणाची नजर लागली? बुमराह, हर्षितनंतर आता ‘हा’ स्टार फलंदाज आजारी!

मुंबई: आयसीसी टी-२० वर्ल्ड कप २०२६ ला ७ फेब्रुवारीपासून दिमाखात सुरुवात झाली आहे. यजमान आणि गतविजेत्या भारतीय संघाने वानखेडे स्टेडियमवर झालेल्या पहिल्याच सामन्यात अमेरिकेचा (USA) २९ धावांनी पराभव करून विजयी सलामी दिली. मात्र, विजयाचा आनंद साजरा होत असतानाच टीम इंडियासमोर दुखापत आणि खेळाडूंच्या बिघडलेल्या प्रकृतीचे मोठे संकट उभे राहिले आहे. जसप्रीत बुमराह आणि हर्षित राणा यांच्यानंतर आता स्टार सलामीवीर अभिषेक शर्माची प्रकृती बिघडल्याची माहिती समोर आली आहे.

नेमकं काय घडलंय?

पहिल्या सामन्यात नाणेफेकीच्या वेळी कर्णधार सूर्यकुमार यादवने चाहत्यांना मोठा धक्का दिला. जगातील सर्वोत्तम गोलंदाज जसप्रीत बुमराह तापेमुळे या सामन्यात खेळू शकला नाही. त्याच्या जागी मोहम्मद सिराजला संधी देण्यात आली. मात्र, ही चिंतेची बाब इथेच थांबली नाही.

सलामीला आलेल्या अभिषेक शर्माकडून मोठ्या खेळीची अपेक्षा होती, पण तो शून्यावर बाद होऊन माघारी परतला. धक्कादायक म्हणजे, अमेरिकेच्या इनिंगमध्ये तो क्षेत्ररक्षणासाठी मैदानात उतरला नाही. सामन्यानंतर झालेल्या पत्रकार परिषदेत मोहम्मद सिराजने स्पष्ट केले की, अभिषेक शर्माचे पोट खराब असल्याने त्याला त्रास होत होता, ज्यामुळे तो क्षेत्ररक्षणासाठी येऊ शकला नाही.

दुखापतींचे सत्र थांबेना!

टीम इंडियाला वर्ल्ड कप सुरू होण्यापूर्वीच अनेक धक्के बसले आहेत:

• हर्षित राणा वर्ल्ड कपबाहेर: वेगवान गोलंदाज हर्षित राणाच्या गुडघ्याला दक्षिण आफ्रिकेविरुद्धच्या सराव सामन्यात दुखापत झाली. या गंभीर दुखापतीमुळे त्याला संपूर्ण स्पर्धेतून बाहेर व्हावे लागले असून त्याच्या जागी मोहम्मद सिराजची संघात वर्णी लागली आहे.
• वॉशिंग्टन सुंदरची अनुपस्थिती: अष्टपैलू खेळाडू वॉशिंग्टन सुंदर देखील प्रकृतीच्या कारणास्तव पहिल्या सामन्यात निवडीसाठी उपलब्ध नव्हता.
• बुमराहचा ताप: बुमराहला झालेल्या तापेमुळे भारतीय गोलंदाजीचे मुख्य अस्त्र पहिल्याच सामन्यात मैदानात दिसले नाही.

चाहत्यांची चिंता वाढली

भारतीय संघ सध्या जबरदस्त फॉर्ममध्ये असला तरी, एकापाठोपाठ एक खेळाडू आजारी पडत असल्याने चाहत्यांमध्ये चिंतेचे वातावरण आहे. सोशल मीडियावर “टीम इंडियाला कोणाची नजर लागली?” असे प्रश्न उपस्थित केले जात आहेत.