काचूरवाही येथील ‘परमात्मा एक’ आश्रमात पुन्हा चोरी; दानपेटी फोडून रोकड लंपास
रामटेक : तालुक्यातील काचूरवाही येथील धार्मिक श्रद्धास्थान असलेल्या ‘परमात्मा एक’ आश्रमात अज्ञात चोरट्यांनी धुमाकूळ घातला आहे. आश्रमातील दानपेटी चोरून नेऊन ती फोडल्याची धक्कादायक घटना समोर आली असून, यामुळे परिसरात तीव्र संताप व्यक्त होत आहे. विशेष म्हणजे, दीड वर्षात या आश्रमात चोरी होण्याची ही दुसरी वेळ आहे.
नेमकी घटना काय?
मिळालेल्या माहितीनुसार, शुक्रवारी मध्यरात्री अज्ञात चोरट्यांनी आश्रमात प्रवेश करून दानपेटी पळवून नेली. चोरट्यांनी ही पेटी आश्रमापासून सुमारे २०० ते ३०० मीटर अंतरावर असलेल्या माता माय मंदिराजवळील मुकेश गोल्हर यांच्या शेतात नेली. तिथे पेटी फोडून त्यातील अंदाजे १० ते १२ हजार रुपयांची रोकड लंपास केली आणि पेटी तिथेच सोडून पळ काढला.
परिसरात भीतीचे वातावरण
सकाळी ही बाब उघडकीस येताच ग्रामस्थांनी आणि आश्रम प्रशासनाने घटनास्थळी धाव घेतली. दीड वर्षांपूर्वीही याच ठिकाणी अशाच प्रकारे चोरी झाली होती, मात्र त्या प्रकरणातील आरोपी अद्याप मोकळेच असल्याने ग्रामस्थांनी पोलिसांच्या कार्यक्षमतेवर प्रश्नचिन्ह उपस्थित केले आहे.
“आम्ही अज्ञात चोरट्यांविरोधात रामटेक पोलीस ठाण्यात तक्रार दाखल करण्याची प्रक्रिया सुरू केली आहे. धार्मिक स्थळावर अशा प्रकारे वारंवार होणाऱ्या चोऱ्यांमुळे भाविकांमध्ये भीतीचे वातावरण आहे.” — अंकुश गोल्हर (अध्यक्ष) व राकेश मोहनकर (सचिव), परमात्मा एक आश्रम संस्था
पोलीस तपास सुरू
घटनेची माहिती मिळताच रामटेक पोलिसांनी तपासाची चक्रे फिरवली आहेत. परिसरातील सीसीटीव्ही फुटेज तपासले जात असून लवकरच चोरट्यांना बेड्या ठोकल्या जातील, असा विश्वास पोलिसांनी व्यक्त केला आहे. मात्र, वारंवार होणाऱ्या या घटनांमुळे रात्रीची गस्त वाढवण्याची मागणी काचूरवाहीच्या नागरिकांनी केली आहे.
