आमदार नसताना सुनेत्रा पवार डायरेक्ट उपमुख्यमंत्री कशा होणार? संपूर्ण कायदेशीर प्रोसेस नेमकी कशी आहे?

मुंबई: राज्याचे उपमुख्यमंत्री अजित पवार यांच्या अकाली निधनाने महाराष्ट्र हादरला आहे. या दुःखद घटनेनंतर राज्याच्या राजकारणात वेगाने चक्रे फिरू लागली असून, अजितदादांची राजकीय वारसदार म्हणून आता त्यांच्या पत्नी सुनेत्रा पवार यांचे नाव समोर आले आहे. राष्ट्रवादी काँग्रेसमधील सर्व प्रमुख नेत्यांनी सुनेत्रा पवार यांना उपमुख्यमंत्री करण्याच्या प्रस्तावावर एकमत दर्शवले असून, त्यांच्या नावावर लवकरच अधिकृत शिक्कामोर्तब होण्याची शक्यता आहे.

३१ जानेवारीला शपथविधी?

राष्ट्रवादीचे ज्येष्ठ नेते छगन भुजबळ यांनी दिलेल्या माहितीनुसार, राष्ट्रवादी विधीमंडळ पक्षाच्या बैठकीत सुनेत्रा पवारांच्या नावाचा प्रस्ताव ठेवला जाईल. या बैठकीनंतर, ३१ जानेवारी रोजी त्यांचा शपथविधी होण्याची दाट शक्यता वर्तवण्यात येत आहे. आज राष्ट्रवादीच्या प्रमुख नेत्यांनी मुख्यमंत्री देवेंद्र फडणवीस यांची भेट घेऊन यासंदर्भात सविस्तर चर्चा केल्याची माहिती समोर येत आहे.

आमदार नसताना सुनेत्रा पवार उपमुख्यमंत्री कशा होणार? (कायदेशीर प्रक्रिया)

सुनेत्रा पवार सध्या राज्यसभेच्या खासदार आहेत, त्या महाराष्ट्र विधीमंडळाच्या (विधानसभा किंवा विधानपरिषद) सदस्य नाहीत. अशा परिस्थितीत त्यांची नियुक्ती कशी होणार, याबाबत सर्वसामान्यांमध्ये उत्सुकता आहे. याची कायदेशीर प्रक्रिया खालीलप्रमाणे असेल:

विधीमंडळ सदस्यत्वासाठी दोन पर्याय:

सुनेत्रा पवार यांना उपमुख्यमंत्रीपद टिकवण्यासाठी खालीलपैकी एका मार्गाचा अवलंब करावा लागेल:

• पर्याय १ (विधानसभा): अजित पवार यांच्या निधनामुळे रिक्त झालेल्या बारामती विधानसभा मतदारसंघात पोटनिवडणूक घेतली जाईल. या निवडणुकीत सुनेत्रा पवार विजयी होऊन विधानसभेत प्रवेश करू शकतात.

• पर्याय २ (विधानपरिषद): जर तातडीने निवडणूक लढवायची नसेल, तर राष्ट्रवादीच्या (अजित पवार गट) विद्यमान विधानपरिषद आमदारांपैकी एकाला राजीनामा द्यावा लागेल. त्या रिक्त जागेवर सुनेत्रा पवार यांची नियुक्ती केली जाऊ शकते.

महत्त्वाची टीप: अजित पवारांच्या निधनामुळे निर्माण झालेली पोकळी भरून काढण्यासाठी सुनेत्रा पवार यांच्यावर ही मोठी जबाबदारी सोपवली जात आहे. आता या राजकीय बदलांकडे संपूर्ण राज्याचे लक्ष लागून राहिले आहे.