केळी बागेत अंतरपिक म्हणून कलिंगडाचा यशस्वी प्रयोग; युवा शेतकरी सौरभ महाजन यांची अडीच महिन्यात तब्बल 12 लाखांची कमाई
जळगाव | जळगाव जिल्ह्यातील रावेर तालुक्यातील वाघोड येथील युवा प्रगतिशील शेतकरी सौरभ महाजन यांनी आधुनिक शेतीचे उत्तम उदाहरण घालून दिले आहे. केळी बागेत अंतरपिक म्हणून कलिंगड घेऊन केवळ अडीच महिन्यांत तब्बल 12 लाखांचे उत्पन्न कमावत त्यांनी शेतकरी वर्गासमोर एक प्रेरणादायी आदर्श ठेवला आहे.
स्थानिकांमध्ये समाजसेवक आणि प्रगतीशील नेतृत्व म्हणून ओळखले जाणारे माजी सरपंच लक्ष्मीकांत महाजन यांचे युवा पुत्र सौरभ यांनी 25 ऑगस्ट रोजी साडेतीन एकर केळी बागेत अंतरपिक म्हणून कलिंगडाची लागवड केली. शेतीतील नैसर्गिक अनिश्चितता असूनही त्यांनी आधुनिक तंत्रज्ञान, प्रणालबद्ध नियोजन आणि मेहनतीच्या जोरावर हा प्रयोग यशस्वी केला.
🔹 उत्पादन आणि विक्री
- एकूण उत्पादन: 67 टन
- ठोक विक्री दर: रु. 2151 प्रति क्विंटल
- एकूण उत्पादनाची विक्री: अंदाजे रु. 15 लाखांपेक्षा जास्त
- एकूण खर्च: सुमारे 3 लाख रुपये
- शुद्ध नफा: तब्बल 12 लाख रुपये
याचा अर्थ असा की, साडेतीन एकरातून फक्त अडीच महिन्यांत लाखो रुपयांचे उत्पन्न, जे ग्रामीण भागातील शेतकऱ्यांसाठी प्रेरणादायी ठरत आहे.
🔹 पुढील उत्पन्नाचीही मोठी अपेक्षा
विशेष म्हणजे— महाजन यांच्या केळी बागेची निसवण काहीच दिवसांत होणार आहे. त्यातूनही चांगल्या दर्जाचा माल मिळण्याची अपेक्षा असल्याने त्यांचे एकूण उत्पन्न लाखोंच्या पुढे जाणार हे निश्चित मानले जात आहे.
युवा शेतकरी सौरभ महाजन यांच्या या नाविन्यपूर्ण प्रयोगामुळे रावेर तालुक्यात तसेच संपूर्ण जिल्ह्यात शेतकऱ्यांमध्ये उत्साहाचे वातावरण आहे. आधुनिक शेती, योग्य नियोजन आणि मेहनतीच्या जोरावर कृषी क्षेत्रातही मोठे यश मिळू शकते, याचा हा उत्तम आदर्श ठरत आहे.
