अमरावती रतनगंज येथे पोलिसांचा छापा! Rahim Gotiwala कडून तलवारींचा साठा जप्त | Amravati Police
ही घटना आहे दिनांक १२ ऑक्टोबर २०२५ रात्री ११:३० वाजताची. गुन्हे शाखेचे पोलीस निरीक्षक संदीप चव्हाण यांना मिळालेल्या गोपनीय माहितीनुसार, गुन्हे शाखेच्या पथकाने तत्काळ अमरावती शहराच्या नागपुरी गेट पोलीस स्टेशन हद्दीतील रतनगंज भागात छापा टाकला.
रतनगंज येथील रहिवासी रहीम खान युसुफ खान, ज्याला रहीम गोटीवाला म्हणूनही ओळखले जाते, त्याच्या राहत्या घरी ही कारवाई करण्यात आली. गुन्हे शाखेच्या पथकाने या आरोपीच्या घराची झडती घेतली असता, त्यांना मोठा शस्त्रसाठा मिळून आला.
जप्त केलेल्या साठ्यामध्ये धारदार स्टीलचे पाते असलेल्या तब्बल १२ मोठ्या तलवारींचा समावेश आहे. या सर्व तलवारींची किंमत अंदाजे २४,००० रुपये इतकी आहे. अवैध शस्त्र बाळगल्याप्रकरणी हा शस्त्रसाठा पोलिसांनी जप्त केला आहे.
आरोपी रहीम खान युसुफ खान, वय ४२ वर्ष, याच्यावर नागपुरी गेट पोलीस स्टेशनमध्ये आर्म्स ॲक्ट कलम ४/२५ सह महाराष्ट्र पोलीस कायद्यान्वये कलम १३५ अंतर्गत गुन्हा दाखल करण्यात आला आहे.
ही महत्त्वपूर्ण कामगिरी मा. पोलीस आयुक्त आणि इतर वरिष्ठ अधिकाऱ्यांच्या मार्गदर्शनाखाली सपोनी मनीष वाकोडे, हे.कॉ. सतीश देशमुख, हे.कॉ. फिरोज खान, पो.कॉ. सुरज चव्हाण, पो.कॉ. शेख नाझीम आणि पो.कॉ. रणजित या गुन्हे शाखेच्या पथकाने यशस्वीरित्या पार पाडली.
शहरात अवैध शस्त्रसाठा बाळगणाऱ्यांविरुद्ध ही कारवाई एक मोठा इशारा आहे.
