महिलांच्या आर्थिक सक्षमीकरणासाठी विशेष कर्ज धोरण राबवा – मंत्री आदिती तटकरे यांचा महत्त्वपूर्ण निर्देश
मुंबई : महिलांच्या आर्थिक सक्षमीकरणासाठी महाराष्ट्र शासनाकडून मोठे पाऊल उचलण्यात आले आहे. राज्यातील विविध महामंडळांच्या कर्ज योजनांचा लाभ महिलांपर्यंत प्रभावीपणे पोहोचावा यासाठी महिला व बालविकास मंत्री आदिती तटकरे यांनी विशेष कर्ज धोरण राबविण्याचे निर्देश दिले आहेत. याच पार्श्वभूमीवर मुंबई जिल्हा मध्यवर्ती सहकारी बँकेशी करार करण्याचे आदेश संबंधित महामंडळांना देण्यात आले आहेत.
कर्ज धोरण व महिला सक्षमीकरण
महामंडळांच्या वैयक्तिक व गट कर्ज व्याज परतावा योजनेच्या लाभार्थी महिलांना व्यवसाय सुरू करता यावा आणि आर्थिकदृष्ट्या सक्षम होता यावे, यासाठी विशेष कर्ज योजना सुरू करण्यात येणार आहे. या योजनेतून महिलांना ₹१०,००० ते ₹१,००,००० पर्यंतचे कर्ज मिळू शकणार आहे. यामध्ये ५ ते १० महिलांचा गट तयार करून सामूहिक व्यवसाय करता येणार आहे.
मुंबई बँकेच्या सहभागाने विशेष योजनेला गती
महत्वाचे म्हणजे, या कर्ज योजनेशी मुंबई जिल्हा मध्यवर्ती सहकारी बँकेचा सहभाग असणार आहे. महिला लाभार्थींना लाडकी बहीण योजनेअंतर्गत लाभ मिळत असल्यामुळे त्यांना अपात्र ठरवता येणार नाही, अशी स्पष्ट सूचना देण्यात आली आहे. यासाठी तातडीने सामंजस्य करार करावा, असेही मंत्री आदिती तटकरे यांनी स्पष्ट केले.
मुंबई बँकेचे लक्षणीय कार्य
मुंबई बँकेचे अध्यक्ष प्रवीण दरेकर यांनी सांगितले की, “बँकेकडे सध्या १६.०७ लाख बचत खाती आहेत. ‘माझी लाडकी बहीण’ योजनेअंतर्गत ५३,३५७ महिलांची झिरो बॅलन्स खाती उघडण्यात आली आहेत. पात्र महिलांना शासनाकडून दरमहा ₹१५०० थेट खात्यात जमा होत आहेत.”
अंगणवाड्यांच्या दर्जात सुधारणा आवश्यक
या बैठकीत अंगणवाड्यांच्या बांधकामावरही चर्चा झाली. मंत्री तटकरे म्हणाल्या, “राज्यातील अंगणवाड्यांच्या उभारणीत एकसमान पद्धत आणि आधुनिक तंत्रज्ञानाचा वापर अनिवार्य आहे. सौरऊर्जेचा वापर, दर्जेदार पोषण आहाराची सोय आणि बालकांच्या सर्वांगीण विकासासाठी अंगणवाड्यांचा दर्जा उंचावण्यासाठी शासन कटिबद्ध आहे.”
उपस्थित मान्यवर:
बैठकीस आमदार चित्रा वाघ, अण्णासाहेब पाटील आर्थिक मागास विकास महामंडळाचे अध्यक्ष नरेंद्र पाटील, वसंतराव नाईक महामंडळाचे व्यवस्थापकीय संचालक प्रताप पवार, तसेच इतर वरिष्ठ अधिकारी उपस्थित होते.
