धक्कादायक! बीडमध्ये पित्याने तीन वर्षांच्या चिमुरडीची हत्या करून आत्महत्या केली; दोन दिवसांनी चिमुरडीचा मृतदेह आढळला

बीड : बीड जिल्ह्यातून एक अत्यंत हृदयद्रावक आणि धक्कादायक घटना समोर आली आहे. अवघ्या तीन वर्षांच्या चिमुरडीची गळफास घेऊन निर्घृण हत्या करण्यात आली असून, तिचा मृतदेह आज सकाळी झाडाला लटकलेल्या अवस्थेत सापडला आहे. विशेष म्हणजे, दोन दिवसांपूर्वी तिच्या वडिलांचा मृतदेह देखील गळफास घेतलेल्या अवस्थेत आढळून आला होता.

दोन दिवसांपूर्वी, जयराम बोराडे (वय अंदाजे ३०) या इसमाने बीडमधील इमामपूर रोड परिसरात आत्महत्या केल्याची घटना उघडकीस आली होती. आत्महत्या करण्यापूर्वी तो त्याच्या तीन वर्षांच्या मुलीला दुचाकीवरून घेऊन गेला होता. त्यानंतर मुलीचा ठावठिकाणा लागत नसल्याने परिसरात एकच खळबळ उडाली होती.

आज सकाळी हाती लागला मृतदेह

बीड ग्रामीण पोलिसांनी मुलीचा शोध सुरु केला होता. आज सकाळी रामनगर परिसरात एका झाडाला गळफास लावलेल्या अवस्थेत तिचा मृतदेह आढळून आला. पोलिसांच्या प्राथमिक तपासानुसार, जयराम बोराडे यानेच रागाच्या भरात किंवा कौटुंबिक कलहातून आपल्या निष्पाप मुलीची हत्या करून नंतर स्वतः आत्महत्या केली असावी, असा प्राथमिक अंदाज वर्तवला जात आहे.

दोन जीवांची अंत्ययात्रा एका घरातून

ही दुर्दैवी घटना संपूर्ण बीड जिल्ह्यास हादरवून टाकणारी ठरली आहे. एका निष्पाप चिमुरडीचा असा अकाली आणि निर्दयी अंत, वडिलांच्या हातूनच, हे मानवी मूल्यांचा घसरणारा स्तर अधोरेखित करणारे आहे.

पोलीस तपास सुरु

बीड पोलिसांकडून या प्रकरणाचा अधिक सखोल तपास केला जात असून, जयराम बोराडे याने हे टोकाचे पाऊल का उचलले? त्यामागचे नेमके कारण काय होते? हे शोधण्याचा प्रयत्न सुरु आहे.

समाजमन हादरलं

या दुहेरी मृत्यूमुळे परिसरात शोककळा पसरली आहे. स्थानिक नागरिक, सामाजिक कार्यकर्ते आणि पोलिसांमध्येही या घटनेबद्दल संताप आणि हळहळ व्यक्त केली जात आहे.

“एका बापाने आपल्या पोटच्या गोळ्याला मारून स्वतः जीव देणं, ही माणुसकीला काळिमा फासणारी गोष्ट आहे. हे आपण समाज म्हणून कुठे चाललो आहोत?” – स्थानिक नागरिकांची प्रतिक्रिया

तपासासाठी माहिती असल्यास पुढे या – बीड पोलीस

कोणत्याही प्रकारची महत्त्वाची माहिती असेल, तर नागरिकांनी बीड ग्रामीण पोलीस ठाण्याशी संपर्क साधावा, असे आवाहन पोलिसांनी केले आहे.