“माझी वसुंधरा अभियान ६.०” अंतर्गत ‘प्रकल्प निसर्गदूत’ व स्वतंत्र बौद्धिक उपक्रम ‘प्रकल्प चेस गुरुकुल’ MoU स्वाक्षरी समारंभ
अमरावती : अमरावती महानगरपालिकेच्या पुढाकाराने आणि आयुक्त सौम्या शर्मा चांडक यांच्या प्रमुख उपस्थितीत दोन महत्त्वपूर्ण शालेय उपक्रमांसाठी सामंजस्य करार (MoU) स्वाक्षरी समारंभाचे आयोजन महानगरपालिका मुख्यालयात करण्यात आले. हे दोन्ही उपक्रम फक्त अमरावती महानगरपालिकेच्या शाळांमधील विद्यार्थ्यांसाठी राबवले जाणार आहेत.
“माझी वसुंधरा अभियान ६.०” अंतर्गत राबविण्यात येणारा ‘प्रकल्प निसर्गदूत’ हा उपक्रम पर्यावरण संवर्धन, शाश्वत जीवनशैली आणि विद्यार्थ्यांमध्ये हरित जागरूकता वाढवण्यावर लक्ष केंद्रित करतो.
दुसरा उपक्रम — ‘प्रकल्प चेस गुरुकुल’ — हा स्वतंत्र बौद्धिक विकास उपक्रम असून, शालेय विद्यार्थ्यांमध्ये बुद्धिबळाच्या माध्यमातून विचारशक्ती, निर्णयक्षमता आणि संयम वाढवण्याच्या उद्देशाने राबविला जाणार आहे.
‘प्रकल्प निसर्गदूत’ अंतर्गत महापालिकेच्या शाळांमधील विद्यार्थ्यांसाठी विविध पर्यावरण कार्यशाळा, वृक्षारोपण मोहिमा, कचरा व्यवस्थापन, जलसंवर्धन आणि हवामान बदलासंबंधी उपक्रम राबवले जातील. याचा उद्देश मुलांमध्ये पर्यावरणविषयक समज आणि जबाबदारी निर्माण करणे आहे.
‘प्रकल्प चेस गुरुकुल’ अंतर्गत सर्व पालिकाशाळांमध्ये बुद्धिबळ प्रशिक्षण सत्रे, मार्गदर्शन शिबिरे आणि स्पर्धांचे आयोजन केले जाईल. प्रशिक्षक विद्यार्थ्यांना बुद्धिबळाच्या विविध डावपेचांची माहिती देतील आणि नियमित सरावासाठी सुविधा उपलब्ध करून दिली जाईल.
आयुक्त सौम्या शर्मा चांडक यांनी यावेळी सांगितले की, “विद्यार्थ्यांच्या व्यक्तिमत्त्व विकासासाठी पर्यावरणाशी एकरूप होणे आणि बौद्धिक क्षमतांचा विकास हे दोन्ही तितकेच महत्त्वाचे आहेत. या दोन्ही उपक्रमांमुळे आमच्या शाळांतील विद्यार्थ्यांमध्ये सजगता, आत्मभान आणि निर्णयक्षमता वाढेल.”
महानगरपालिकेच्या विविध उपक्रमांची प्रभावी अंमलबजावणी करताना आयुक्त सौम्या शर्मा चांडक यांनी महत्त्वपूर्ण निर्देश दिले की, पर्यावरण जनजागृतीसाठी व्यापक कार्यक्रम राबवा. शाळा, महाविद्यालये आणि स्थानिक समुदायांमध्ये ‘प्रकल्प निसर्गदूत’ अंतर्गत जनजागृती मोहीम राबवावी. वृक्षारोपण, कचरा व्यवस्थापन, जलसंवर्धन यासारख्या बाबतीत प्रत्यक्ष सहभाग वाढवावा.
विद्यार्थ्यांच्या बौद्धिक विकासासाठी ‘चेस गुरुकुल’ प्रभावीपणे कार्यान्वित करा. बुद्धिबळ हा खेळ विचारशक्ती, संयम व निर्णयक्षमता वाढवतो. त्यामुळे शहरातील सर्व शाळांमध्ये प्रशिक्षकांच्या माध्यमातून नियमित प्रशिक्षण सत्रे घ्यावीत व स्पर्धांचे आयोजन करावे. सर्व भागधारकांमध्ये समन्वय साधा. या उपक्रमांमध्ये शाळा, स्वयंसेवी संस्था, पालक आणि महानगरपालिका यांच्यात समन्वय ठेवून सहभाग वाढवावा. प्रत्येक उपक्रमाचे मोजमाप व मूल्यांकन करा.
दोन्ही प्रकल्पांचे यश मोजण्यासाठी नियमित अहवाल, फीडबॅक व प्रगती मूल्यांकन प्रणाली विकसित करावी. नवीन कल्पनांचे स्वागत करा. उपक्रम अधिक प्रभावी करण्यासाठी नागरिक, विद्यार्थी व शिक्षकांकडून नव्या कल्पना व सूचना घेऊन त्यांची अंमलबजावणी करण्यास प्रोत्साहन द्या.
यावेळी शिक्षणाधिकारी डॉ. प्रकाश मेश्राम, प्रवदा फाउंडेशनचे संस्थापक अविरत देशपांडे, चेस गुरुकुल सविता चॅरिटेबल ट्रस्टचे सचिव मंदार बक्षी, व्हिलींग फाउंडेशनचे संस्थापक उमंग मोंगा यांच्यासह संबंधित संस्थांचे प्रतिनिधी देखील उपस्थित होते.
