कन्नड बस स्थानक व्यवस्थापक स्वाती बाखडे यांचा विद्यार्थिनींना मदतीचा हात: मोफत बस सेवा आणि तत्काळ मदतीचे आवाहन
छत्रपती संभाजीनगर: कन्नड बस स्थानकाच्या व्यवस्थापक स्वाती बाखडे यांनी विद्यार्थिनींसाठी एक महत्त्वाचे आणि कौतुकास्पद पाऊल उचलले आहे. बसने शाळेत ये-जा करणाऱ्या विद्यार्थिनींना काही अडचण आल्यास तात्काळ संपर्क साधण्याचे आवाहन त्यांनी केले आहे. श्री संघर्ष पगारे कन्नड यांच्या सदिच्छा भेटीदरम्यान त्यांनी विद्यार्थ्यांशी संवाद साधून त्यांच्या समस्या जाणून घेतल्या आणि त्यांना बससेवेबाबत मोफत मदत करण्याचे आश्वासन दिले.
या भेटीदरम्यान, स्वाती बाखडे यांनी विद्यार्थ्यांना बससेवेतील अडचणी आणि चालक-वाहकांकडून मिळणाऱ्या सहकार्याबाबत विचारणा केली. विद्यार्थ्यांकडून सकारात्मक प्रतिसाद मिळाल्याने त्यांनी समाधान व्यक्त केले. तसेच, नवीन बस पास संदर्भातही त्यांनी विद्यार्थ्यांना उपयुक्त माहिती दिली.
यावेळी त्यांनी विशेषतः विद्यार्थिनींना उद्देशून, बस सेवेसंदर्भात किंवा इतर कोणत्याही प्रकारची अडचण आल्यास थेट बस स्थानकाशी संपर्क साधण्याचे आवाहन केले. त्यांची ही भूमिका विद्यार्थिनींच्या सुरक्षिततेसाठी आणि त्यांना येणाऱ्या अडचणी सोडवण्यासाठी अत्यंत महत्त्वाची ठरणार आहे.
