रामटेक तालुक्यात कंत्राटी कामगाराचा मृत्यू; विद्युत पोलवरून पडल्याने दुर्दैवी घटना
नागपूर जिल्ह्यातील रामटेक तालुक्यातील पिपरिया परिसरात आज सकाळी सुमारे आठ वाजताच्या सुमारास ही दुर्दैवी घटना घडली.
मृत कामगाराचे नाव सेवकराम कोटीराम मलघाम (वय ३२ वर्षे) असून ते डोंगरताल येथील रहिवासी होते. ते Maharashtra State Electricity Distribution Company Limited च्या कामासाठी कंत्राटी पद्धतीने कार्यरत होते.
मिळालेल्या माहितीनुसार, ते एबी इलेक्ट्रॉनिक कंपनीच्या ठेकेदारामार्फत विद्युत दुरुस्तीचे काम करत होते.
दरम्यान, वाघोली (पिपरिया) येथे विद्युत पोलवर चढून काम करत असताना अचानक त्यांचा तोल गेला आणि ते खाली कोसळले.
या अपघातात त्यांच्या डोक्याला गंभीर दुखापत झाली. घटनेनंतर सहकाऱ्यांनी आणि स्थानिक नागरिकांनी त्यांना तातडीने देवलापार येथील ग्रामीण रुग्णालयात दाखल केले.
मात्र डॉक्टरांनी तपासणीनंतर त्यांना मृत घोषित केले.
या घटनेनंतर परिसरात हळहळ व्यक्त होत असून कंत्राटी कामगारांच्या सुरक्षेबाबत गंभीर प्रश्न उपस्थित झाले आहेत.
स्थानिक नागरिकांच्या मते, संबंधित कामगाराला आवश्यक सुरक्षा साधने पुरवण्यात आली नव्हती. महावितरणच्या नियमांनुसार प्रशिक्षित लाईनमननेच अशा प्रकारचे काम करणे अपेक्षित असते. मात्र प्रत्यक्षात कंत्राटी कामगारांकडून धोकादायक काम करून घेतले जात असल्याचा आरोप करण्यात येत आहे.
या प्रकरणाची सखोल चौकशी करून जबाबदारांवर कठोर कारवाई करण्याची मागणी नागरिकांकडून केली जात आहे.
या दुर्दैवी घटनेमुळे पुन्हा एकदा कंत्राटी कामगारांच्या सुरक्षिततेचा मुद्दा समोर आला आहे. संबंधित विभाग यावर काय कारवाई करतो, हे पाहणं महत्त्वाचं ठरणार आहे.
