नागपूर शहरात पुन्हा एकदा वाहन चोरीच्या गुन्ह्याचा मोठा पर्दाफाश करण्यात पारडी पोलिसांना यश आले आहे. तब्बल ५० लाख रुपयांचा मुद्देमाल जप्त करत एका आरोपीला अटक करण्यात आली आहे. ही कारवाई पोलिस आयुक्तांच्या मार्गदर्शनाखाली पार पाडण्यात आली आहे. पाहूया सविस्तर वृत्त…
नागपूर शहरातील पारडी पोलीस ठाण्यात भारतीय न्याय संहिता कलम ३०३(२) अंतर्गत ट्रॉली चोरीचा गुन्हा दाखल करण्यात आला होता. फिर्यादी शाहीद रहीम उर्फ आबिद अली, वय ५५ वर्षे, रा. भेपूश नगर, मोरेवाडा, नागपूर यांनी दिलेल्या तक्रारीनुसार, त्यांनी पार्किंगमध्ये उभी करून ठेवलेली एम.एच. ४० ए.के. ५३३४ क्रमांकाची १८ चाकांची पिवळ्या रंगाची टाटा ट्रॉली अज्ञात आरोपींनी चोरून नेली होती. या ट्रॉलीची अंदाजे किंमत १५ लाख रुपये असल्याचे नमूद करण्यात आले होते. घटनेचे गांभीर्य लक्षात घेऊन पारडी पोलिसांनी तात्काळ तपास सुरू केला. गुप्त माहिती तसेच तांत्रिक तपासाच्या आधारे पोलिसांनी पेट्रोलिंगदरम्यान संशयित आरोपीला ताब्यात घेतले.
संदीप राजपती माधव (वय ३३ वर्षे), सध्या गुजरात राज्यातील पत्ता असलेला – याने चौकशीदरम्यान गुन्ह्याची कबुली दिली. आर्थिक फायद्यासाठी चोरी केल्याचे त्याने सांगितले. पोलिसांनी आरोपीकडून सुमारे ५० लाख रुपयांचा मुद्देमाल जप्त केला आहे.
वाहन चोरीच्या घटनांवर प्रभावी कारवाई करत पारडी पोलिसांनी मोठे यश मिळवले आहे. आर्थिक फायद्यासाठी चोरी करणाऱ्या आरोपीला अटक करून ५० लाखांचा मुद्देमाल हस्तगत करण्यात आला आहे. नागपूर शहरात कायदा आणि सुव्यवस्था राखण्यासाठी पोलिसांचे प्रयत्न सुरूच आहेत.
