१७ वर्षीय मुलीचा संशयास्पद मृत्यू – पोलिसांवर गंभीर आरोप
भंडारा जिल्ह्यातील लाखांदूर तालुक्यातील चिचोली गावात एक अत्यंत धक्कादायक आणि संवेदनशील घटना समोर आली आहे. १७ वर्षीय अल्पवयीन मुलीने विषप्राशन केल्याची घटना घडली असून उपचारादरम्यान तिचा मृत्यू झाला आहे. या प्रकरणात पोलिसांवर चौकशीदरम्यान मानसिक दबाव टाकल्याचा आणि मारहाण केल्याचा गंभीर आरोप कुटुंबीयांनी केला आहे.
भंडारा जिल्ह्यातील लाखांदूर तालुक्यातील ग्राम चिचोली येथे ही धक्कादायक घटना घडली. मृत मुलगी अवघी १७ वर्षांची असून ती अल्पवयीन असल्याची माहिती आहे. प्राप्त माहितीनुसार, गावातील एका किराणा व्यवसायिकाने संबंधित मुलीवर तब्बल २५ हजार रुपयांची चोरी केल्याचा आरोप करत लाखांदूर पोलीस ठाण्यात तक्रार दाखल केली होती. यानंतर पोलिसांनी मुलीला चौकशीसाठी ताब्यात घेतल्याची माहिती समोर येत आहे. चौकशीदरम्यान तिने चोरीची कबुली दिल्याचा दावा केला जात असला तरी कुटुंबीयांचा आरोप आहे की तिच्यावर मानसिक दबाव टाकण्यात आला आणि मारहाण करण्यात आली. चौकशीनंतर तिला घरी सोडण्यात आले. मात्र काही वेळातच तिने घरात विषप्राशन केल्याचे समोर आले.
तिला तातडीने भंडारा जिल्हा सामान्य रुग्णालयात दाखल करण्यात आले. मात्र उपचारादरम्यान तिचा दुर्दैवी मृत्यू झाला. या घटनेनंतर चिचोली गावासह संपूर्ण लाखांदूर तालुक्यात संतापाची लाट उसळली आहे. अल्पवयीन मुलीशी चौकशी करताना कायदेशीर नियमांचे पालन झाले का? मानसिक दबाव टाकला गेला का? मारहाणीचे आरोप कितपत सत्य आहेत? अशा अनेक प्रश्नांची उत्तरे अद्याप अनुत्तरित आहेत. कुटुंबीयांनी या संपूर्ण प्रकरणाची निष्पक्ष आणि सखोल चौकशी करण्याची मागणी केली आहे. दरम्यान, पोलिसांची अधिकृत भूमिका अद्याप स्पष्ट झालेली नाही. या प्रकरणाचा तपास सुरू असून सत्य नेमके काय आहे हे चौकशीनंतरच स्पष्ट होणार आहे.
ही घटना अत्यंत संवेदनशील असून अल्पवयीन मुलीच्या मृत्यूमुळे परिसरात तीव्र भावना व्यक्त होत आहेत. सत्य काय आहे हे तपासातून समोर येईलच, मात्र या प्रकरणात पारदर्शक आणि निष्पक्ष चौकशी होणे अत्यंत गरजेचे आहे.
