धारणी–परतवाडा घाटमार्गावर भीषण अपघात; एसटी बस-बोलेरो समोरासमोर धडक, ६–७ जण गंभीर जखमी
धारणी | प्रतिनिधी
धारणी–परतवाडा घाटमार्गावर बुधवारी भीषण अपघात झाला असून एसटी बस आणि बोलेरो यांची समोरासमोर धडक झाली. या अपघातात ६ ते ७ जण गंभीर जखमी झाले असून सुदैवाने कोणतीही जीवितहानी झालेली नाही. जखमींना तातडीने रुग्णालयात दाखल करण्यात आले आहे.
बुधवारी धारणी ते परतवाडा या घाटमाथ्यावरील मार्गावर अमरावतीहून खंडव्याकडे जाणाऱ्या महाराष्ट्र राज्य परिवहन महामंडळच्या बस क्रमांक MH 20 GC 3781 आणि समोरून येणाऱ्या महिंद्रा बोलेरो (MP 09 TA 9586) यांच्यात समोरासमोर जोरदार धडक झाली.
अपघाताची माहिती मिळताच शेमाडोह, परतवाडा आणि चिखलदरा येथून मदत पथके व पोलीस तात्काळ घटनास्थळी दाखल झाले. जखमींना त्वरित जवळच्या रुग्णालयात हलवून उपचार सुरू करण्यात आले आहेत.
प्राथमिक माहितीनुसार घाटरस्ता, वळणावळणाचा मार्ग आणि वेग यामुळे हा अपघात झाल्याची शक्यता वर्तवली जात आहे. या घटनेमुळे काही काळ वाहतूक विस्कळीत झाली होती. भीषण धडक असूनही जीवितहानी टळल्याने मोठी दुर्घटना टळली आहे; मात्र प्रवाशांमध्ये भीतीचे वातावरण निर्माण झाले आहे.
पोलिसांनी घटनास्थळाचा पंचनामा करून पुढील तपास सुरू केला आहे.
धारणी–परतवाडा घाटरस्त्यावर झालेल्या या अपघाताने पुन्हा एकदा रस्ते सुरक्षेचा प्रश्न ऐरणीवर आला आहे. वेगावर नियंत्रण आणि सावधगिरी बाळगणे किती महत्त्वाचे आहे, हे या घटनेतून अधोरेखित झाले आहे.
