भंडारा जिल्ह्यात पोलीस स्टेशनमध्येच रंगात आली ‘ओली पार्टी’; मद्यधुंद पोलिसाचा व्हिडिओ व्हायरल

भंडारा (प्रतिनिधी): कायद्याचे रक्षण करण्याची जबाबदारी असलेल्या पोलिसानेच पोलीस स्टेशनला मद्यपानाचा अड्डा बनवल्याचा संतापजनक प्रकार भंडारा जिल्ह्यात समोर आला आहे. करडी पोलीस स्टेशनमधील एका कर्मचाऱ्याचा पोलीस ठाण्यातच बसून दारू पितानाचा व्हिडिओ सोशल मीडियावर व्हायरल झाला असून, यामुळे पोलीस दलाची मोठी नाचक्की झाली आहे.

नेमका प्रकार काय?

भंडारा जिल्ह्यातील करडी पोलीस स्टेशनमध्ये कर्तव्यावर असलेल्या एका पोलीस कर्मचाऱ्याने पोलीस ठाण्यातीलच एका खोलीत दारूची पार्टी मांडली होती. समोर दारूची बाटली, पेला आणि चकणा अशा थाटात हा महाशय निर्ढावलेपणाने मद्यप्राशन करताना कॅमेऱ्यात कैद झाला आहे. हा व्हिडिओ समोर आल्यानंतर संपूर्ण जिल्ह्यात खळबळ माजली असून नागरिकांमधून संतप्त प्रतिक्रिया उमटत आहेत.

प्रशासनाची कारवाई

हा व्हिडिओ सोशल मीडियावर वाऱ्यासारखा पसरल्यानंतर पोलीस विभागाची प्रतिमा मलीन झाली. याची गंभीर दखल घेत भंडारा पोलीस अधीक्षकांनी संबंधित पोलीस कर्मचाऱ्याला तात्काळ निलंबित (Suspend) करण्याचे आदेश दिले आहेत.

जनतेचा संतप्त सवाल

“कायद्याचे रक्षण करणारेच जर अशा प्रकारे कायद्याची पायमल्ली करत असतील, तर सामान्यांनी दाद कुणाकडे मागायची?” असा सवाल आता उपस्थित केला जात आहे. पोलीस स्टेशनमध्ये अशा प्रकारे गैरप्रकार घडत असतील, तर तेथे येणाऱ्या सर्वसामान्य जनतेला सुरक्षा कशी मिळणार? हा प्रश्न अनुत्तरित आहे.

हे कृत्य केवळ एका कर्मचाऱ्यापुरते मर्यादित आहे की पोलीस दलातील शिस्तीचा अभाव आहे, यावर आता चर्चा रंगली आहे.

बातमी: साहिल रामटेके, भंडारा