मुंबईकरांसाठी Good News! 2026 मध्ये सुरु होणार 5 नवे उड्डाणपूल, शहरातील कोणत्या भागाची ट्रॅफिक आटोक्यात येणार

मुंबई: मुंबईतील प्रवासाचा वेग वाढवण्यासाठी आणि वाहतूक कोंडीचा कणा मोडण्यासाठी महानगरपालिकेने (BMC) कंबर कसली आहे. येत्या काही महिन्यांत मुंबईतील ५ अत्यंत महत्त्वाचे उड्डाणपूल नागरिकांच्या सेवेसाठी खुले होणार आहेत. यामध्ये बहुप्रतिक्षित सायन पूर्व-पश्चिम पुलाचा समावेश असून, १५ जुलै २०२६ ही या सर्व कामांसाठी अंतिम मुदत निश्चित करण्यात आली आहे.

पालिकेचे अतिरिक्त आयुक्त अभिजीत बांगर यांनी नुकतीच सायन पुलाची पाहणी केली असून, या वर्षात मुंबईचा कायापालट होणार असल्याचे संकेत दिले आहेत.

१. सायन पूर्व-पश्चिम उड्डाणपूल (Sion RoB)

• सद्यस्थिती: पुनर्बांधणीचे काम वेगाने सुरू आहे. रेल्वे हद्दीत रेल्वे प्रशासन आणि अ‍ॅप्रोच रोडचे काम पालिका करत आहे.
• फायदा: पश्चिम भागाचे काम ३१ मे पर्यंत पूर्ण होईल, तर संपूर्ण पूल १५ जुलै २०२६ पर्यंत वाहतुकीसाठी खुला होईल. यामुळे सायन परिसरातील वर्षानुवर्षे चालणारी कोंडी संपणार आहे.

२. बेलासिस उड्डाणपूल (Belasis Bridge)

• सद्यस्थिती: ३३३ मीटर लांबीच्या या पुलाचे काम जवळपास पूर्ण झाले आहे.
• फायदा: हा पूल फेब्रुवारीच्या पहिल्या आठवड्यातच कार्यान्वित होणार आहे. दक्षिण मुंबईतील वाहतुकीसाठी हा मोठा दिलासा असेल.

३. विद्याविहार पूल (Vidyavihar Bridge)

• सद्यस्थिती: ८०३ मीटर लांबीच्या या पुलाचे ८० टक्के काम पूर्ण झाले आहे.
• फायदा: हा पूल घाटकोपर पूर्वेकडील रामचंद्र चेंबूरकर मार्गाला पश्चिमेकडील एलबीएस मार्गाशी जोडेल. यामुळे विमानतळावर जाणाऱ्या प्रवाशांचा वेळ वाचणार आहे. हा पूल जून २०२६ मध्ये खुला करण्याचे नियोजन आहे.

४. दिंडोशी-फिल्म सिटी उड्डाणपूल (GMLR Project)

• सद्यस्थिती: गोरेगाव-मुलुंड लिंक रोडचा भाग असलेल्या या पुलाचे ७५ टक्के काम पूर्ण झाले आहे.
• फायदा: गोरेगाव ते मुलुंड प्रवासाचा ७५ मिनिटांचा वेळ आता फक्त २५ मिनिटांवर येईल. हा पूल ३१ मे २०२६ पर्यंत खुला करण्याचे उद्दिष्ट आहे.

५. महालक्ष्मी केबल-स्टेड ब्रिज (Mahalakshmi Cable-Sted Bridge)

• सद्यस्थिती: ५५ टक्के काम पूर्ण झाले असून ४०० कोटी रुपये खर्चून हा पूल बांधला जात आहे.
• फायदा: हा मुंबईचा पहिला केबल-स्टेड ब्रिज असेल जो सात रस्ता परिसराला महालक्ष्मी मैदानाशी जोडेल. नोव्हेंबर २०२६ च्या पहिल्या आठवड्यात हा पूल वाहतुकीसाठी खुला होईल.

कोणत्या भागाला किती दिलासा मिळणार? (तक्ता)