ठाकरे बंधूंच्या युतीच्या घोषणेचा मुहूर्त ठरला! संजय राऊतांनी तारीख आणि वेळ जाहीर केली

महाराष्ट्राच्या राजकारणात मोठी घडामोड समोर येत आहे. शिवसेना (उद्धव बाळासाहेब ठाकरे) आणि महाराष्ट्र नवनिर्माण सेनेच्या (मनसे) संभाव्य युतीबाबत अखेर स्पष्ट संकेत मिळाले आहेत. ठाकरे बंधूंच्या युतीची घोषणा कधी होणार? या चर्चेला खासदार संजय राऊत यांनी पूर्णविराम दिला आहे.

संजय राऊत यांनी आपल्या एक्स (Twitter) अकाऊंटवर राज ठाकरे आणि उद्धव ठाकरे एकमेकांना पुष्पगुच्छ देताना दिसणारा फोटो पोस्ट केला आहे. या फोटोसोबत त्यांनी केवळ ‘उद्या 12 वाजता’ अशी कॅप्शन दिली असून, यामुळे राजकीय वर्तुळात खळबळ उडाली आहे.

उद्या दुपारी 12 वाजता मोठी घोषणा?

राऊतांच्या पोस्टनंतर शिवसेना-मनसे युतीची अधिकृत घोषणा उद्या दुपारी 12 वाजता होण्याची दाट शक्यता वर्तवली जात आहे. अनेक दिवसांपासून ठाकरे बंधू एकत्र येणार असल्याच्या चर्चा सुरू होत्या. मात्र, आजच्या या पोस्टमुळे या चर्चांना अधिकृत संकेत मिळाल्याचं मानलं जात आहे.

महाराष्ट्राच्या राजकारणात मोठा टर्निंग पॉइंट

जर ही युती प्रत्यक्षात जाहीर झाली, तर आगामी महापालिका आणि विधानसभा निवडणुकांच्या पार्श्वभूमीवर हा निर्णय महाराष्ट्राच्या राजकारणात मोठा टर्निंग पॉइंट ठरू शकतो. विशेषतः मराठी मतदारांमध्ये या युतीचा मोठा प्रभाव पडण्याची शक्यता राजकीय विश्लेषक व्यक्त करत आहेत.

कार्यकर्त्यांमध्ये उत्साह, राजकीय वर्तुळात खळबळ

संजय राऊतांच्या या एका ओळीच्या पोस्टनेच शिवसेना आणि मनसेच्या कार्यकर्त्यांमध्ये उत्साहाचं वातावरण निर्माण झालं आहे. तर दुसरीकडे, राज्यातील सर्वच राजकीय पक्षांचे लक्ष उद्याच्या दुपारी 12 वाजताच्या घोषणेकडे लागून राहिलं आहे.