स्त्रीभ्रूण हत्येला आळा घालणे, मुलींच्या जन्माचे प्रमाण वाढवणे तसेच मुलींच्या शिक्षण व सर्वांगीण विकासाला चालना देण्यासाठी राज्य सरकारने सुरू केलेल्या ‘लेक लाडकी’ योजनेला पुणे जिल्ह्यात उत्स्फूर्त प्रतिसाद मिळत आहे. आतापर्यंत जिल्ह्यातील ५४०० अर्ज मंजूर करण्यात आले असून, संबंधित लाभार्थी मुलींच्या बँक खात्यात पहिला ५ हजार रुपयांचा हप्ता जमा करण्यात आला आहे.
महिला व बाल विकास विभागामार्फत राबविण्यात येणाऱ्या या योजनेअंतर्गत मुलीच्या जन्मापासून ते १८ वर्षांपर्यंत टप्प्याटप्प्याने एकूण १ लाख १ हजार रुपये थेट बँक खात्यात जमा केले जाणार आहेत.
योजनेला चांगला प्रतिसाद
एप्रिल महिन्यात राज्य सरकारने ‘लेक लाडकी’ योजना सुरू केली होती. लोकसभा व विधानसभा निवडणुकांमुळे काही काळ प्रक्रियेला खंड पडला होता. मात्र, आतापर्यंत पुणे जिल्ह्यातून ७३९२ अर्ज दाखल झाले असून, त्यापैकी ५४०० अर्ज मंजूर झाले आहेत. उर्वरित १९९२ अर्ज प्रलंबित असून, काही अर्जांमध्ये त्रुटी आढळल्याने त्या दुरुस्तीसाठी अर्जदारांना सूचना देण्यात आल्या आहेत.
अधिकाऱ्यांच्या मते, या योजनेमुळे मुलींचे शिक्षण, आरोग्य व सामाजिक दर्जा उंचावण्यास मदत होणार आहे.
‘लेक लाडकी’ योजनेचे लाभ
- मुलीच्या जन्माचे स्वागत व प्रोत्साहन
- स्त्रीभ्रूण हत्येला आळा
- मुलींच्या शिक्षणासाठी आर्थिक आधार
- १८ वर्षांपर्यंत टप्प्याटप्प्याने रक्कम जमा
- मुलींना स्वावलंबी व सक्षम बनविण्यास मदत
कसा कराल अर्ज?
ग्रामीण भागासाठी
- अंगणवाडी सेविका किंवा पर्यवेक्षिका यांच्याकडे अर्ज करता येईल
शहरी भागासाठी
- अंगणवाडी सेविका किंवा मुख्य सेविका यांच्याकडे अर्ज स्वीकारले जातील
अर्ज प्रक्रिया
- अर्जाची प्राथमिक पडताळणी
- शहर/ग्रामीण भागातील बाल विकास प्रकल्प अधिकारी यांच्याकडे अर्ज
- अंतिम मंजुरीसाठी महिला व बालकल्याण विभागाचे मुख्य कार्यक्रम अधिकारी किंवा उपनगरातील नोडल अधिकारी यांच्याकडे पाठविला जाईल
सर्वांगीण विकासासाठी महत्त्वाची योजना
‘लेक लाडकी’ योजना मुलींच्या आरोग्य, शिक्षण आणि सामाजिक सक्षमीकरणासाठी मैलाचा दगड ठरत आहे. उच्च शिक्षणासाठी मुलींना प्रोत्साहन देणे व त्यांना आर्थिकदृष्ट्या सक्षम बनवणे, हा या योजनेचा मुख्य उद्देश आहे, असा विश्वास महिला व बाल विकास विभागाच्या अधिकाऱ्यांनी व्यक्त केला आहे.
