आगामी महानगरपालिका निवडणुकांच्या पार्श्वभूमीवर पोलीस प्रशासन अॅक्शन मोडमध्ये
नवनियुक्त पोलीस आयुक्त राकेश ओला यांची शहरातील संवेदनशील भागांची पाहणी
अमरावती, दि. ___ :
आगामी महानगरपालिका निवडणुकांच्या पार्श्वभूमीवर शहरातील सुरक्षा व्यवस्था अधिक कडक करण्यासाठी पोलीस प्रशासन पूर्णपणे अॅक्शन मोडमध्ये आले आहे. नवनियुक्त पोलीस आयुक्त राकेश ओला यांनी पदभार स्वीकारताच शहरातील प्रमुख व संवेदनशील भागांचा प्रत्यक्ष पाहणी दौरा केला.
या पाहणीदरम्यान राजकमल चौक, चित्रा चौक यांसह शहरातील इतर महत्त्वाच्या ठिकाणी सुरक्षा बंदोबस्त, वाहतूक नियंत्रण तसेच गर्दी व्यवस्थापनाची सखोल पाहणी करण्यात आली. निवडणुकीच्या पार्श्वभूमीवर कायदा व सुव्यवस्था अबाधित राखण्यासाठी पोलीस अधिकाऱ्यांना स्पष्ट व कडक सूचना देण्यात आल्या.
संवेदनशील ठिकाणी अतिरिक्त पोलीस बंदोबस्त तैनात करणे, सातत्याने पेट्रोलिंग वाढवणे, वाहतूक सुरळीत ठेवणे आणि कोणतीही अनुचित घटना घडू नये यासाठी विशेष दक्षता घेण्याचे आदेश पोलीस आयुक्तांनी दिले आहेत. निवडणूक कालावधीत कायदा व सुव्यवस्थेबाबत कोणतीही तडजोड केली जाणार नाही, असा स्पष्ट इशाराही त्यांनी यावेळी दिला.
या पाहणीवेळी डीसीपी श्याम घुगे, सिटी कोतवाली पोलीस ठाण्याचे वरिष्ठ अधिकारी, कोतवाली नाका येथील अधिकारी तसेच मोठ्या संख्येने पोलीस अधिकारी व कर्मचारी उपस्थित होते.
आगामी निवडणुका शांततापूर्ण, निर्भय आणि सुरक्षित वातावरणात पार पाडणे हीच पोलीस प्रशासनाची सर्वोच्च प्राथमिकता असल्याचे यावेळी स्पष्ट करण्यात आले.
