आयुक्त सौम्या शर्मा चांडक यांच्या अध्यक्षतेखाली आढावा बैठक संपन्न
अमरावती, दि. — :
अमरावती महानगरपालिकेच्या आगामी निवडणुकांचे बिगुल वाजले असून निवडणूक प्रक्रिया पारदर्शक, निर्भय आणि सुव्यवस्थित पार पाडण्यासाठी महापालिका प्रशासनाने कंबर कसली आहे. याच पार्श्वभूमीवर महापालिका आयुक्त तथा निवडणूक अधिकारी सौम्या शर्मा चांडक यांच्या अध्यक्षतेखाली आज एक महत्त्वपूर्ण आढावा बैठक पार पडली.
महानगरपालिकेच्या कॉन्फरन्स हॉलमध्ये सकाळी ११ वाजता झालेल्या या बैठकीस सर्व विभाग प्रमुख उपस्थित होते. बैठकीत आचारसंहिता कक्षाचे व्यवस्थापन, कायदा व सुव्यवस्था, निवडणूक पथकांचे नियोजन आणि तक्रार निवारण व्यवस्था यावर सविस्तर चर्चा करण्यात आली.
विशेषतः FST (फ्लाइंग स्क्वॉड टीम), SST (स्टॅटिक सर्व्हिलन्स टीम), VST, आणि VVT या पथकांना सतर्क राहण्याचे स्पष्ट निर्देश आयुक्तांनी दिले. तसेच CVIGIL आणि ESMS या आधुनिक प्रणालींच्या माध्यमातून येणाऱ्या तक्रारींचे वेळेत आणि प्रभावी निवारण करण्यावर भर देण्यात आला.
यावेळी मनुष्यबळ नियोजन, मतमोजणी केंद्रांची स्वच्छता, स्ट्राँग रूमची सुरक्षा, कर्मचाऱ्यांचे प्रशिक्षण, तसेच निवडणूक काळात कोणतीही अडचण निर्माण होऊ नये यासाठी ‘एक खिडकी योजना’ आणि वाहतूक नियोजन यावरही आयुक्तांनी बारकाईने आढावा घेतला.
निवडणूक प्रक्रियेत कोणतीही त्रुटी राहू नये, यासाठी सर्व अधिकाऱ्यांनी समन्वयाने आणि वेळेत कार्यवाही करावी, असे निर्देश आयुक्त सौम्या शर्मा चांडक यांनी दिले.
एकूणच, अमरावती महानगरपालिका प्रशासन आगामी निवडणूक शांततापूर्ण आणि पारदर्शक वातावरणात पार पाडण्यासाठी पूर्णतः सज्ज झाले असल्याचे चित्र या बैठकीतून स्पष्ट झाले असून, आता प्रत्यक्ष निवडणूक कामकाजाला वेग येणार आहे.
