वेळ अमावस्येच्या सणानिमित्त लातूरमध्ये गावाकडे गर्दी; शेतात वनभोजनाची परंपरा जिवंत
लातूर – वेळ अमावस्येच्या पवित्र सणानिमित्त मराठवाड्यातील गावागावात आनंदाचे वातावरण पसरले आहे. शहरातील गजबजाट मागे टाकत, शिक्षणासाठी आणि नोकरीसाठी बाहेर असलेले तरुण, विद्यार्थी तसेच संपूर्ण कुटुंब गावाकडे रवाना झाले आहेत.
लातूरच्या मध्यवर्ती बस स्थानकावर आज प्रचंड गर्दी पाहायला मिळाली. प्रत्येकाच्या चेहऱ्यावर घरच्या ओढीचा आनंद दिसत होता. या सणानिमित्त शेतातील वनभोजनाची जुनी परंपरा आजही जिवंत आहे. शेतात कुटुंबासोबत बसून आईच्या हातच्या पदार्थांचा आस्वाद घेतल्याने सणाची खरी मजा अनुभवायला मिळते.
विद्यार्थ्यांनी आणि तरुणांनी गावाकडे परतताना हिरवीगार शेत, मातीचा सुगंध आणि निसर्गाच्या सान्निध्यात घालवलेला वेळ अनुभवण्याचा उत्साह व्यक्त केला. हा सण केवळ धार्मिक नाही, तर सामाजिक आणि भावनिकदृष्ट्या कुटुंबांना जोडणारा असतो, असे स्थानिक नागरिकांनी सांगितले.
